Sorkarin Kelkang ṭanpuina tur ruahman

Mizoram sorkar chuan NLUP sum, bank-a dah pung aṭangin Pathiana harhna thlen mekna hmun, Kelkang khaw mipuite chhawmdawl dan tur a ruahman.

Kelkang chhawm­dawl dan tur ngaihtuah hian Ningani khan chief minister Lal Thanhawla, minister dangte leh NLUP Implementing Board chairman JH Ro­ṭhuama te NIB Con­ference Hall-ah an ṭhu­khawm a; Kelkang khua chu harhna vanga mi sang tam takin an pan avang te, thlawhhma la hman lo leh mahni hna thawk hman lote an awm avangin a bika ṭanpuina pek ni an rel a ni.

Ṭanpuina atan hian NLUP sum pung aṭangin vawk leh ar an vulh dan tur leh, sumdawnna tênau aṭanga eizawnna an neih theih dan tur ruahmansak tum a ni. Kelkang mite zingah hna thawh tur ruahmansak hmang ṭang­kai thei lo an awm pawhin, Chhumchhe Ṭanpui­na Scheme aṭangin ṭanpui ni se, an ti.

Harhna chhimtu mipui pung khawm ma­mawh zualpui pek dan tur leh harsatna sut­kian dan turte an rel a; tui, inthiarna ṭha zawk, bawlh­hlawh thenfaina, dam­lote enkawlna leh zirna kawngah a ṭul anga ṭanpuina pek an rel bawk.

Ṭhutkhawmnaah hian Chief Minister bakah Home minister R Lalzirliana, Finance minister Lalsawta leh UD&PA minister Zo­dintluanga leh Champhai DC H Lalengmawia te an tel.