MZP-in Kawrthah H/S-a kal turte an dang

MZP sub-headquarters, Kawrthah chuan Kawrthah High School-ah zirtirtu dah belh tura an phûtna tihhlawhtlin a nih loh avangin nimin aṭang khan Kawrthah H/S-a zirtirtu leh zirlaite sikul kai tur an dang ṭan.

Kawrthah MZP tarlan danin, Kawrthah H/S-a zirtirtu dah belh turin sorkarah vawi tam tak an ngen tawh a, mahse tun thlengin an la dah belh lo. Chuvang chuan lung­awi lohna lantirin June 8, 2015 aṭangin zirlaite'n badge dum belin sikul an kai a; nimin aṭang khan sikul kai tur an dang leh ta a ni.

Kawrthah MZP chuan, June 9, 2015 zana Kawrthah VC leh NGO zawng zawngte inhmuh khawmnaah School Education director biak nawn leh an rel tih an sawi a; sorkar hotute be tura an mi tirhte thu leh hla ngaichâng chunga hmalak zel an tum thu an sawi bawk.

Kawrthah H/S-ah hian regular teacher pathum chauh awmin, zirlai 80 chuang an awm mek nia sawiin, Kawrthah MZP-te chuan, "Zirtirtu an indaih loh avangin a awm chhunte an rim em em a, zirlaite’n zirtirna an dawng ṭha tawk lo a, HSLC exam thlengin result tha pawh an nei hlei thei lo a ni," an ti.