Sikulte'n result an lawm

13th June, 2015

Zotuitlang YMA Education Sub-Committee chuan nimin khan an huam chhunga zirlai tiṭhate lawmpuina hun an hmang a, Lunglei HPC vice chairman S Laldingliana'n a hmanpui. Tlungvel Higher Secondary School pawhin nimin khan kumin HSLC-a 100% pass result an neih an lawm a, parliamentary secretary Joseph Lalhimpuia'n a hmanpui.

Tlungvel HSS-in kumin HSLC-a 100% pass result an neih nimina an lawmnaa khuallian, parliamentary secretary (School Education) Joseph Lalhimpuia chuan, sikul chu certifcate neihna tur mai ni loin, hun lo kal zel tura training ground a nih thu a sawi.

Joseph Lalhimpuia chuan, School Education department chu Mizorama lehkhathiam zawng zawngte chher chhuaktu a nih laiin, chanchinbu leh social media-a sawiselna leh vauna thu dawng tam ber a nih thu a sawi a, "Sikul khâr, pisa kai tur dan leh a dangte a awm chángin zirlaite'n nasa takin an tuar ṭhin. Hetiang invauna leh dodalnain zirna a tihchhiat dan tur kan ngaihtuah phâk lo hi a pawi a ni," a ti.

Tlungvel HSS hi khawtlangin May 4, 2010-a an din a ni a, an din aṭangin kum li chhung chu 100% pass result an nei tawh a; kumina result chhuakah an candidate 16-te an pass vek a ni.

S Laldingliana chuan, ram leh khawtlang hmasawn tak tak turin zirna ngaih pawimawh leh lehkhathiam chher chhuah tam a ṭul thu a sawi a; zirtirtute chu an zirlai naupangte chu an ‘file’ pawimawh ber an ni tih hria a, zirlaite'n an lehkha zirna kawnga phûr tak leh lehkhathiam ni châk tura boruak siam thiam turin a chah.

Zotuitlang aṭangin hian kuminah HSLC exam-a hlawhtling zirlai pakua leh HSSLC exam-a hlawhtling zirlai pahnih an awm a ni.

Nimin vêk khan St. Joseph Higher Secondary School pawhin an sikul aṭanga HSSLC pass tharte lawmpuina hun Ramhlun Indoor Stadium-ah an buatsaih a, minister pahnih PC Lalthanliana leh C Ngunlianchunga ten an hmanpui.

Sihphir Higher Secondary School pawhin nimin khan HSSLC 2015-a pass tharte lawmpuina hun, Sihphir Arpu YMA Hall-ah an buatsaih a, deputy speaker R Lalrinawma'n a hmanpui. Sihphir HSS-ah hian HSSLC 2015-ah candidate 10 awmin an passed vek a ni.