Krismas & kum thar hlim taka hmang turin CM-in mipuite duhsakna a hlan

Chief minister Lalduhoma chuan Krismas leh kum thar lo thleng tur pualin thuchah a tichhuak a; Mizoram mipuite Krismas leh kum thar hlim taka hmang turin duhsakna a hlan a, halpuah leh halmawi hâl lo turin Mizoram mipui a sáwm.

CM Lalduhoma chuan, hmangaihte thihna avanga khawhar taka hun hmang zawng zawng tan Pathian thla­muanna a dil thu a tarlang a, "Bawrhsâwmna leh dam lohna vanga Mizoram chhung leh pawn damdawi-ina awm mek te, mahni ina inenkawl mek zawng zawngte tan Pathian awmpuina leh tihdamna ka dil a ni. Zirna, hnathawhna leh rawngbawlna avanga Mizorama rawn haw thei ve lo kan unau zawng zawngte pawh kan rilruah in awm reng a, Krismas leh kum thar hlim taka hmang turin duhsakna ka hlan che u," a ti.

Krismas hi Pathian thil thlàwn pek khawvelin a dawnna ní a nih anga mahni inphata mi harsa zawkte tana luang chhuak kohhran, pawl leh mimal tam tak an awm tih a hriat thu sawiin CM chuan, "In chungah ka lawm a, in hnathawh ropui tak hian Pathian a chawimawi a, Kristian nih hlutzia leh Zo fate nihlawhzia a tilang a ni," a ti a, Krismas lo thleng tur chu inremna ní-ah hmang turin mipui a chah.

Lalduhoma chuan, kum 2025 lo her chhuak tur chu Mizoram mipui tan kum ṭha a nih theih nan duhsakna a hlan a, "Kan siamṭhat theih tawh loh kan nun hluia thil ṭha lote theihnghilhin, mi ṭha zawk ni turin hma lam i pan zel ang u. Pathian leh ram mipui zarah ka kaihhruai sorkar chuan kum khat a lo tling ve ta. Ram mipui leh sorkar hnathawkten min thawhpui ṭha a, kan lawm em em a ni," a ti.

Chief Minister chuan, Krismas leh kum thar hlim taka hman a nih theihna tura theihtawp chhuaha thawktute chungah a lawm thu sawiin, "In thawhrimna zarah mipuite'n hlim leh thlamuang taka hunpui kan hman ṭhin avangin in hlu em em a ni," a ti a; sorkarin a khap halpuah leh halmawi hâl lo turin Mizoram mipui a sáwm bawk.