State Library-ah lehkhabu 72,425 a awm, mipuiin chhawr ṭangkai lehzual se an duh

Mizoram State Library-ah lehkhabu 72,425 a awm mek. State Library-a thawktute chuan, tun aiin mipuite'n library chhawr ṭangkai lehzual thei se an duh thu an sawi.

Vanglaini palai zawhna chhanga state librarian Zothanglawra Ralte-in a sawi danin, State Library-ah hian member 9,478 an awm mek a, puitling 8,080 leh naupang 1,390 an ni. Lehkhabu hawh turin member nih a ngai a, a hmuna chhiar tur erawh chuan member nih kher a ngai lo. Sorkar kum kal mekah puitling 320 leh naupang 64-in lehkhabu an hawh tawh.

Lehkhabu hawh kher loa a hmuna chhiar ṭhin ni tin an awm ve deuh reng a, chu'ng mite chu zirlai leh research scholar-te an ni tlangpui. Lehkhabute chu duh ang zawng zawng chhiar theih a ni.

State Library-a lehkhabu awm mekte chu 72,425 a ni a, an ṭhen danah general 49,072, naupang lehkhabu 5,924 leh Hindi lehkhabu 17,427 a ni. Lehkhabu bakah chanchinbu an la nual a; newspaper-ah English panga leh Mizo paruk an la a, magazine-ah English panga leh Mizo pakhat an la. Chanchinbute chu a duh tan a hmunah chhiar theih a ni.

State Librarian chuan, an library chu mi eng emaw zatin an chhawr ṭangkai mek rualin, tun aiin chhawr ṭangkaitu tam lehzual se an duh thu a sawi a, "Mobile phone-a chhiar ngawt ai chuan lehkhabu ngei chhiar hi chuan hriat reng a awl bik," a ti.

Tunlaiah mi tam tak social media vanga lehkha chhiar peih tawh lo an awm rualin, social media-in a tihbuai loh naupang leh ṭhalai eng emaw zat an awm thu sawiin Zothanglawra chuan, "State Library-ah hian a duh tan member nih theih reng a ni," a ti. Member ni lote pawh State Library hmang ṭangkai a, an lehkhabute chhiar ṭhin turin a sáwm bawk.