DoNER Ministry kaltlanga investment hîp tura hmalakna a fakawm - Governor

Governor Dr Hari Babu Kambhampati chuan December 21, Inrinni khan Tripura khawpui Agartala-a Pragna Bhavan-a North Eastern Council (NEC) Plenary Meeting vawi 72-naah thu a sawi a, DoNER Ministry kaltlanga investment hîp tura hmalakna fakawm a tih thu a sawi.

Dr Hari Babu Kambhampati chuan, investment chungchangah Mizoramin ṭan a la tih sawiin, "Mizoram pawhin inter-departmental Investment Promotion Cell dinin, tourism & hospitality leh skill development-ahte thawk dunin investor-te nen hmalak mek a ni," a ti.

Mizorama khua 118-te chu kumtluana zawh theih kawngpui ṭhain a la pawh loh avangin fûrpui laiin tlawhpawh a harsat thu leh PMGSY hnuaia siam tur pawhin ami chengte an tlem avangin danin a remtih loh thu Larsap chuan a sawi.

Governor chuan, "Mizoramah kum 2021 aṭangin National Mission on Edible Oils-Oil Palm (NMEO-OP) kalpui a ni a, oil palm ṭiak duhkhawp a awm loh avang leh a phurh chhuahna kawngpui a ṭhat tâwk loh avangtein hmalakna zauh a har rih hle. Hmarchhak state-te hi organic farming-a hma la ṭha an ni," a ti.

Dr Hari Babu Kambhampati chuan, DoNER-in growth centre 24 leh border centre 20 tinzawna North East Economic Corridor din tura ruahmanna a neih mekah ram dang aṭanga investment partner tam zawk hîp a nih theih nan ramri kaltlanga insumdawn tawnna ngai pawimawh turin DoNER a ngen. Industry 4.0 leh National Education Policy 2020 kaihhnawihah vocational education chuan Mizoramah dinhmun pawimawh tak a luah thu sawiin, DoNER leh NEC hnenah skill development centre ṭha ber ber din a ṭul thu a thlen.

State sorkar hnuaia industrial training institute-te tihchangtlun a ṭul thu te, khawpui lian zualah handloom leh handicraft bakah, organic thlai pho chhuahna tur common exhibition centre mamawh a nih thute Larsap chuan a sawi. Tun hnaia Ashtalakhsmi Mahotsav neih zawh taka Prime Minister-in hmarchhak state chu India ram bung pawimawh tak a nih thu leh sorkarin hmathlir awmze nei tak hnuaia Act East Policy kalpui zel a tum tih a sawi chu lawmawm a tih thu leh, DoNER leh NEC-te'n North East Region Vision, 2047 ṭha tak an siam chu fakawm a tih thu a sawi bawk.