Mizoram sorkarin industrial zone din a duh - Chief Minister

Chief minister Lalduhoma chuan Viksit Bharat 2047 leh DoNER Ministry hmalakna tihlawhtling zual turin Mizoram sorkar chuan world class infrastructure nena thuam industrial zone din a duh tih a sawi.

December 21, Inrinni khan Tripura khawpui Agartala-a Pragna Bhavan-ah North Eastern Council (NEC) Plenary Meeting vawi 72-na neih a ni a, Union Home minister Amit Shah, NEC chairman ni bawkin a kaihruai. He Meeting-ah hian CM Lalduhoma'n thu sawiin, NEC kal zelna tur leh India hmarchhak bial hmasawnna tur thil pawimawhte a sawi a ni.

Chief Minister chuan, Viksit Bharat 2047 tihhlawhtlin nan leh DoNER Ministry hmalakna tihlawhtling zual turin Mizoram sorkarin world class infrastructure nena thuam industrial zone din an duh thu a sawi a, "Entreprenuer lamah sang tak thlen tumin Bána Kaih Scheme kan tlangzarh tawh a, dilna pawh sing chuang a lut tawh. Kum rei lo têah Sustainable Development Goals leh employment siam belh lamah kan ṭhan chhoh ngei kan ring," a ti.

Tun hnaia sorkar laipuiin NEC leh DoNER Ministry budget a tihpun avang leh DoNER Minister-in kawng engkimah phûr tak leh inhawng taka a thawhpuia lawmthu sawiin Lalduhoma chuan, "Prime Minister-in 'Hmarchhak bialte hi India ram economic power house ni thei khawp hiala theihna (potential) nei an ni' tia a lo sawi tawh angin, hmarchhak bialah chak taka hmasawnna kalpui turin remna leh muanna boruak ṭha tak siam a ngai," a ti a, theihtawp chhuah turin kal khawmte a sáwm.

Chief Minister hi adviser to CM TBC Lalvenchhunga, OSD to CM R Lalrodingi, PIO to CM K Saitluanga leh additional PS to CM C Lalhmunliana ten an ṭawiawm a ni.