ZPM-in protected area chungchangah thutlukna ennawn turin Central phût

ZPM party chuan thuchhuah siamin, sorkar laipuiin protected area regime-a Mizoram a puang chu ṭha lo an tih thu leh, sorkar laipui chu a thutlukna ennawn leh tura an phût thu an tarlang.

ZPM chuan, Ministry of Home Affairs-in tun hnai khan Mizoram Chief Secreatry hnenah Mizoram chu foreigner Protected Area Regime (PAR)-a puan a nih thu lehkhain a rawn hriattir tih an tarlang a, "ZPM chuan Mizoram state ralmuang leh hmasawn mek protected area-a central sorkarin a puang hi ṭha kan ti lo a, central sorkar hian he thutlukna hi ennawn leh se kan duh hle a ni," an ti.

Mizoram chu state ralmuang leh hmasawn mek a nih thu sawiin ZPM chuan, "A bik takin tourism lamah hma kan sawn mek a, kalphung thar mipui sorkar hnuaia khualzin mite hîp kawnga kan hmalaknate kawng tam takin PAR-a min puanna hian a tiṭhuanawp dawn a ni," an ti a; ram dang aṭanga Mizoram tlawh duhte'n Ministry of Home Affairs aṭangin Protected Area Permit (PAP) an neih zel a ngai tawh dawn tih an tarlang.

ZPM party chuan, ram dang mite tana Mizorama lut tura PAP neih zel a ngai tur chuan khualzin hîp kawngah harsatna a thlen thei dawn tih an sawi a, "Zo fate hi ram pathum - India, Myanmar leh Bangladesh-ahte ṭhendarha kan awm avangin kan unau ram danga awmte tan Mizoram tlawhpawh kawngah harsatna a thlen theih dawn avangin ṭha kan ti lo hle a, central sorkarin thutlukna a siam hi a rang lama ennawn leh thuai turin kan phût a ni," an ti.

Thu dawn danin, Foreigners (Protected Areas) Order, 1958 hnuaiah hun rei tak chhung Mizoram chu protected area-ah puan a lo ni tawh a, ram dang mi, Mizorama rawn lutte chu sorkarah an inhriattir a ngai ṭhin. He kalphung hi sorkar laipui chuan January 2011 khan kum 2027 thleng atan a lo hnâwl (suspend) tawh a, mahse, December 17, 2024 aṭanga hman turin PAR-ah a puang leh ta a ni. Mizoram bakah hian, Manipur leh Nagaland state-te pawh puan a ni bawk.