Aizawlah No Vehicle Zone kalpui ṭan dawn

Vawiin hian chawhma dar 10 aṭanga tlai dar 4 inkar chhung Aizawlah No Vehicle Zone kalpui a ni dawn a, Zodin Square leh Chanmari kâwn inkarah lirthei tlân phal a ni dawn lo. No Vehicle Zone hi naktuk December 24 leh kum tawp ni, December 31-ah kalpui leh a ni ang.

No Vehicle Zone chung-changah hian Traffic SP Stephen Lalrinawma chuan lirthei tlan dan turah ruahmanna a siam a; Zone huam chhungah lirthei rêng rêng (thirsakawr leh nawrlirh huamin) tlân phal a ni dawn lo a; damdawi-ina emergency duty leh dam lohna vanga damdawi-in pante erawh a huam lo.

Aizawl hmar lam aṭanga chhim lam pan tan Chanmari kâwn thleng bak tlan theih a ni dawn lo a, city bus-te chu Chanmari Presbyterian Kohhran biak in hêlin kual lêt tur a ni. Chhim lam aṭanga hmar lam pante chu Zodin Square-a Assam Rifles mantir kawng kualah kual let tur a ni thung.

No Vehicle Zone huam chhung kawngpui hêlna kawngpui hrang hrangah traffic jam vanga harsatna a thlen loh nan kawngpui sirah bungrua leh lirthei dah khap a ni.

Traffic SP chuan, No Vehicle Zone hêlna kawngin a paltlang local council hruaitute chu traffic jam vanga mipuiin harsatna an tawh loh nan theihtawp chhuahpui turin a ngen a, "Kawngpui dunga lirthei leh bungrua dah hnawk a awm loh nan veng chhung information centre aṭanga min puanzarsak tura ngen leh beisei an ni," a ti.