Minister-in field siam mek a tlawh

UDPA minister K Sapdanga, Aizawl North-III bialtu ni bawk chuan December 21, Inrinni khan Aizawl Smart City sum hmanga a bial chhung Edenthar Venga field siam chhunzawm zel dan tur a enfiah.

K Sapdanga chuan, sum duh anga tam hman tur a awm lo chungin khelmual puitling ṭha tak siam a nih ngei a beisei thu a sawi a, "Sorkar hmasa aṭanga hna lo thawh ṭan tawh Edenthar Field hi a puitlin ngei theihna turin theihtawp chhuah a ni a, ruahmanna hmasa siam danglam hlek hlek ngai a awm avangin hna a chak thei lo hi a pawi hle," a ti a, a chak thei ang bera hna thawh a nih theihna turin hmalak zel a tum thu a sawi.

Minister hi Aizawl Smart City chief executive officer CC Lalchhuangkima leh engineer te, Edenthar Veng Branch YMA, sports association hruaitute leh mi pawimawh dangte'n an ṭawiawm a; Edenthar Venga hmasawnna hna thawh dangte a tlawh nghal bawk.