Raltlante hnenah Krismas thilpek hlan

Manipur leh Myanmar aṭanga sahimna zawnga Mizorama Zo hnahthlak awm mek zinga Aizawl leh a chhehvela mite tan Central YMA chuan December 21, Inrinni zing khan Krismas thilpek a sem chhuak.

CYMA-in ṭanpuina a pek chhuah hi buhfai, dailuah, tél leh bekangsa te a ni a; Sairang, Sihhmui, BSUP Edenthar Veng, RAY Falkland Veng, Tuirial leh Durtlang Leitana awm raltlan chhungkaw 257-te hnenah sem a ni.

Raltlante tana Krismas thilpek an sem chhuahte vailiam hunah CYMA president Lalhmachhuana chuan, Zo hnahthlak raltlante chu Mizorama an awm chhungin an awmna ṭheuhah Mizo nun ze mawi nunpui tur te, ram leilung fate khawsak phung baka khawsa bik lo tur leh, ei leh bar an zawnnaah mi dang tana hnawksaka awm lo turin a chah.

CYMA hian Mizoram hmun hrang hranga raltlan camp-a awmte tan kumin Krismas pualin thilpek cheng nuai 25 hû a sem chhuak tawh a ni.