Hnahthialah kumin chhungin thubuai 64 ziaklut tawh; rûkrûk thubuai 32 awmin a tam ber

Hnahthial district-ah kumin January aṭanga December 23, 2024 thleng khan thubuai 64 ziahluh niin, mi 74 man an ni. Thubuai zingah rûkrûk thubuai a tam ber.

Nimin khan Hnahthial addl. SP Lalhmangaihhlua chuan a pisaah Hnahthial district MJA member-te thingpui inpuiin, kumin chhunga Hnahthial Police te hmalakna a hrilhfiah bakah, Krismas thilpek a hlan a ni.

Tarlan danin, January 1-December 23, 2024 chhung khan Hnahthial district-a Hnahthial Police Station leh Thingsai Police Station-ah thubuai 64 ziahluh niin, hemi kaihhnawihah hian mi 74 man an ni. Thubuai ziah luh 64 zinga 56 hi chinfel a ni tawh a, chhuizui mek pariat ala awm.

Thubuai 64 zinga 32 hi rûkrûk (burglary/theft) thubuai niin a tam ber a, zu khapna dan (MLP Act) hnuaia thubuai ziah luh 16-in a dawt a ni.