Council of Ministers thukhawmin Gorkha-te OBC dinhmun pek a duhsak a, zir chian zui turin a dah

December 20, 2024-a chief minister hoa Mizoram sorkara Council of Ministers thukhawm chuan Mizorama Gorkha-te'n Other Backwarded Class (OBC) dinhmun (status) an dilna an ngaihtuah a; zir chian zui atan an dah.

Sorkar thuchhuah tarlan danin, Mandal Commission-in Gorkha-te OBC an nih ve theihna dan a duang a, chu chu social, education leh economic hmanga teh tur an ni. Heng tehna hmanga teh chuan

Mizorama Gorkha-te chu mi dangte aia an hniam bikna a awm lo a, Mandal Commission tehna atang chuan OBC status pek theih an ni lo, tih tarlan a ni.

Hetih lai hian, Mizoram sorkar chuan Mizorama Gorkha-te chu Central sorkar reservation hnuaia OBC pek chu a duhsak a; OBC status chu nei ta se, Mizoram sorkar hnuaia reservation neih phah nan an hman dawn leh dawn loh zir chian phawt ni se, tiin thu an dah a ni.

Cabinet chuan Lunglei High Powered Committee thiah rawtna an ngaihtuah a; Lunglei Municipal Council (LMC) a awm hma kha chuan Lunglei HPC hi thil tula ngaih a ni a, LMC a awm tâkah chuan 'thuang hniha awm zel hi a tha em' tih zirchianna neih zel ni se, an ti.

One-time 'Mizoram Special Voluntary Retirement Scheme, 2024' chungchang an ngaihtuah a, an pawm. Hei hi sorkar hnathawk, hna thawk zui thei lo leh tlak lote hamthatna tha tawk tak nena an chawlh (retire) theihna tur scheme a ni a; eorkar department tinte chu Service Review Committee din vek tura tih mek an ni.

Zoram Medical College (ZMC) Mizoram sorkar enkawlna pumhlûma dah rawtna 'Proposal for conversion of ZMC into a fully government run medical institution' pawm a ni. Sawifiahnaah chuan,

ZMC-ah hian thawktu chi hnih - state sorkar hnuaia thawk leh ZMC Society hnuaia thawk an awm a; Society hnuaia thawkte pawh state sorkar hnuaia dah luh vekna tur a ni.

Council of Ministers thukhawm chuan sorkar department-te sâwi khâwm leh siamrem rawtnate an pawm a, hetiang hian department sâwi khâwm leh siamrem tura tih a ni.

Information & Public Relations Department leh Printing & Stationery department-te chu chhûn fin a ni ang a, a hming atan Information, Public Relations, Printing & Stationery (IPRPS) tih a ni ang.

Local Administration Department (LAD) chu Rural Development (RD) nen kaihkawp a ni ang a; a hmingah Rural Development & Administration Department tih a ni ang.

Tribal Affairs chu a len tak em avangin Art & Culture Department nen department pakhata chhùn fin a ni ang a, a hmingah Tribal Affairs & Culture Department tih a ni ang.

Additional agenda - Mizoram State University dinna tura dan siam rawtna,

The Mizoram State University Bill, 2024 pawm a ni. Bill hi dan ni tur chuan Legislative Assembly-ah pawm phawt a ngai dawn a, chumi hnuah Governor pawmpuina a la ngai dawn bawk.

COUNCIL OF MINISTERS-IN A PAWM DANGTE

* Proposal for Adoption of (The Water Prevention and Control of Pollution) Amendment Act, 2024' by Government of Mizoram.

* Proposal for allotment of land at Rahsi Veng, Lunglei for District Court in supercession of the decision of the Council of Ministers dated 22.11.2022. (Sorkar hmasa Cabinet rorel thiatin Lunglei District Court atana pek tum chu pawm a ni).

* The Mizoram Youth Commission Bill, 2024. (MYC Bill a la awm ngai lo va. Mizo thalaite Mizoram pawn leh India ram pawna hna thawk tura thawn chhuah a hmalak tak tak sorkarin a tum avangin Bill hi pawm a ni).

* Proposal for amendment of Rule 3(ii) of Mizoram School Education Department (Terms and condition of appointment of teaching & School Edn non-teaching staff of provincialized school) Rules, 2023. (School Provincialization Rules, 1994 chu kum 2023 khan sorkarin tidanglamin, school provincialised thara thawktute, a bik takin headmaster turah 'as decided by government' tiin dah a ni a, chu chu zir chian leh ni se tia rel a ni.

* Proposal for addition of the new provision "Power to Relax" in the School Education conditions for provincialization of schools. (Kum 2023-a school provicialization dan siama condition thenkhat chu, khawpui lam school tana zawm harsa lo, thingtlang lam school tana zawm harsa tak si a awm thei nia hriat a nih avangin, rules pawhfân theihna dan siam belhna a ni.

* Proposal for framing of Mizoram Education (Lumpsum Grant-in-Aid for General Maintenance of Private School) Rules, 2024. (Hei hi Lump Sum Grant-in-Aid dawng thei tur mumal taka bithliahna leh School Management Committee siam thatna a ni).

* Proposal for framing of Mizoram Education (Provisional Adhoc Grants-in-Aid for General Maintenance of Private School) Rules, 2024. Assembly-a la pass ngai a ni. (Kum 20 chhung zet Grant-in-Aid rules lo hman tawh a ni a. Provisional Adhoc School te tana grant-in-aid pek ve theihna dan erawh a awm lo. He ruahman hian private school-te provisional adhoc status-a dah theihna siam thlengin a huam dawn).