Home Minister-in urlâwk zanah duty-te a tlawh kual

Home minister K Sapdanga leh police hotute chuan December 24, Krismas urlâwk zan khan Aizawl veng hrang hranga YMA leh VDP-te an tlawh kual.

Home Minister chuan, khawtlang himna leh ralmuanna tura khaw vawt tak hnuaia thawk chhuakte a hmuh chuan a tihphur thu a sawi a, "YMA kan nei bik hi lawmawm tak zet. Hmun dangah an nei lo. Hlawh nei loa duty chungin theihtawp an chhuah a ni. A chhunga kan awm ve awm lai aiin tunah hian YMA tangkaina ka hmu chiang. In hnathawh kan ngaisang a ni," a ti.

Halpuah leh halmawi hâl a nih lohna atan sorkarin theihtawp a chhuah tih sawiin K Sapdanga chuan, sorkar thu zâwm a, tangkaina nei lo halpuah leh halmawi hâl lo turin mipuite a ngen.

Home Minister hi IGP Lalbiakthanga Khiangte, DIG C Lalthanmawia, Aizawl SP Rex Zarzoliana Vanchhawng leh thuneitu dangte'n an tawiawm a ni.