PM hlui Dr. Manmohan Singh sûnna thu CM-in a tichhuak

Chief minister Lalduhoma chuan, December 26, 2024, Ningani zana prime minister hlui Dr Manmohan Singh a thi chuan a tihlungngaih thu a tarlang.

Dr. Manmohan Singh thih chungchang hi CM Lalduhoma chuan social media-ah tarlangin, "A thihna hian min tilungngai tak zet. India economy siamthatna leh thanna atana Dr. Manmohan Singh-a hnathawh leh sorkar a kaihhruai dante hi tenkhin rual a ni lo a, mi fing leh inngaitlawm a ni. A chhungte leh lainâte ka tawrhpui tak zet a; a thlarau muangin châwl rawh se," a ti.

Mizoram Congress party president Lal Thanzara pawhin sûnna thuchah tichhuakin, Dr. Manmohan Singh-a'n a kalsan a chhungte leh laináte a tawrhpui thu a tarlang a; "India economy siamthatu a ni a, tawng tam lo, inngaitlawm, ram tana thawk nasa a ni. Min kalsan ta hi ram tan chànna nasa tak a ni," a ti a, Mizoram mipui hmasawnna tura a inpeknate'n thalaite leh Mizorama Congress party-ah chakna a pek thu a tarlang.