Goods & Services Tax Bill pass a ni Entry Tax leh VAT tihtawp a ni dawn Nuai 5 aia tam la lut tan Service Tax

Parliament House pahnih - Rajya Sabha leh Lok Sabha-te chuan India ram puma chhiah lâkna dan thar duan, Goods and Services Tax (GST) Bill an pass tâk avangin The Mizoram Entry Tax leh value added tax (VAT) tihtawp a nih dawn a; kum khata Rs. 5,00,000 aia tam la lutte'n Service Tax an chawi a ngai dawn.

GST Bill hi Lok Sabha-ah pass a nih hnuah, hun rei tak chhung Rajya Sabha-ah khel a ni a, August 3 zan khan an pass ve leh ta a ni.

GST hi April 2017 aṭanga hman ṭan tura ruahman a ni a, Mizoramah pawh GST hman a nih hunah chuan The Mizoram Entry Tax, VAT leh state sorkarin chhiah dang a lak ṭhinte chu tihtawp a ni ang.

Taxation department hotute hnen aṭanga thu dawn danin, GST hman hunah chuan Mizoramah kum khata Rs. 5,00,000 aia tam la lutte'n service tax an pek a ngai tawh dawn. Service tax hi Rs. 5,00,000 aṭanga nuai 150 chin la lutte aṭang chuan state-in a la dawn a, cheng nuai 150 aia tam la lutte aṭang chuan sorkar laipuiin a la thung dawn a ni.

Service tax hi sorkar hna-thawk ni lo, eng hna thawk pawh Rs. 5,00,000 chin chung lam kum khata la lutte chuan an pek a ngai dawn a ni.

Service tax lak tur zat hi bithliah fel a la ni lo a, chhiah lak zat tura sang ber revenue neutral rate (RNR) atan 17%-18% ruahman chhin a ni a, mahse pawm a la ni lo.

Study Committee-te'n an zir chiang ang a, an zir chianna
aṭangin thuneitute'n service tax zat tur an bithliah ang. Bungrua (goods) aṭanga chhiah lak zat tur pawh bithliah a la ni lo a, 17%-19% chin tho ruahman chhin a ni a, Study Committee zir chian hnuah a zat tur bithliah a ni ang.

Taxation department hotute chuan, GST chu thil siam chhuaktu state (producing state) aiin thil siam chhuah hmangtu state (con-suming state)-te'n an hlâwkpui zawk tura tih a nih thu sawiin, "Chhiah lak zat tur hi bithliah la ni lo mah se, state leh sorkar laipui tana hlohna ni lo, mipuite tana phurrit lutuk loa lak tum a ni," an ti.

Zawhna chhangin Taxation hotute chuan, GST chu Mizoram chuan a hlâwkpui an ring a, "Mithiamte'n an chhût dan chuan, sorkara chhiah tlingkhawm chu GST hman hma aiin a tam zawk dawn a. GST hnuaiah hian tun hmaa Mizorama la tih ngai loh service tax lak a ni dawn a, heta
ṭang hian eng emaw zat lak luh rin a ni," an ti a; Mizoramin chhiah a hmuhna ṭhinah chàn tur a awm lo niin an sawi.

Taxation department hotute sawi danin, GST hman hnuah The Mizoram Entry Tax, VAT leh state sorkarin chhiah dang a lak ṭhinte tihtawp vek a ni dawn a, GST hnuaia chhiah lak tur zat bituk anga lak a ni ang. The Mizoram Entry Tax hi kumin sorkar kum thar aṭanga lak ṭan a ni a, quarter khatnaah cheng nuai 63 hmuh a ni.

GST hi India ram puma chhiah inang tlaka lakna tura ruahman ni mah se, zu leh tuialhthei aṭanga chhiah lakte chu a huam dawn lo a ni.

GST hman a nih hun chuan

• Rs. 5,00,000 chin la lutte'n service tax an pek a ngai dawn.

• Service tax atan 17%-19% ruahman chhin a ni.

• Entry tax, VAT leh state-in chhiah a lak dang tihtawp tur a ni.

• GST hnuaia chhiah bituk ang ram pumah hman a ni ang.

• Mizoramin chhiah a hmuh a pun beisei a ni.

• Zu leh tuialhthei aṭanga chhiah lak a huam dawn lo.