Gas phurah harsatna a awm lo - FCSCA

Food Civil Supply & Consumers Affairs (FCSCA) derpartment hotute chuan, gas bottling plant aṭanga gas distributor-te hnena gas pek kawngah harsatna a awm an hriat loh thu an sawi.

Vanglaini palai zawhna chhangin FCSCA hotute chuan, tun hnaia social media-a thuthang, 'Central YMA-in gas bûk tling lo endik hna ngawrh taka an thawh avangin truck-te'n gas an phur ṭha duh lo' tih chu an hriat ve loh thu an sawi a, "Gas lak luh kawngah harsatna kan nei lo a, tunlai phei chu kan lak luh ṭhat lai tak a ni," an ti.

Supply department hotute sawi danin, gas phur tur hian IOC-in tender an chhuah a, truck neitute'n an chhang
ṭhin. Truck-te'n an phur ṭha duh lo a nih chuan IOC lamin action an la thei a ni.

Gas chu a thlenna hmun tura a thleng ṭha lo a nih chuan Supply department chuan IOC-ah zawhna an zawt thung ang a; mahse, tun dinhmunah gas thlen ṭhat lohna a awm loh avangin IOC zawhna zawh a ngai rih lo.

Gas hi nimin khan Aizawl-ah domestic cylinder 2,626 leh commercial cylinder 98 a thleng.

Zawhna chhangin FCSCA hotute chuan, "Gas hi ni tin a rawn thlen zat a dang-lam a, thla khat dan-ah kan khaikhawm ṭhin. Vawiina rawn thleng hi a tam ṭum ni lo mah se, a laihâwl vel a ni," an ti.

FCSCA department hotute chuan, tun hnaiah gas bûk tling lo report an dawn loh thu sawiin, "Gas distributor-te chu gas bûkna kenga bûk vek tura tih an ni. Mahse, hmun ṭhenkhatah mipuiin bûk kher an duh lo
ṭhin. Kan tan vek a ni tih hriain mi-puite'n bûk duh vek se kan duh hle," an ti.

Gas bûk tling ngei anga lang, tui thun awma rinhlelh awm a awm chuan Legal Metrology hnenah hriattir vat turin Supply department hotute chuan mipui an chah a ni.