IAS hmasa Rev.Dr CL Rema a thi

Mizoram aṭanga IAS-a tling hmasa ber, Rev.Dr CL Rema (91) s/o Thanzinga (L) chu Nilaini zan dar 12 vel khan a chenna Shillong-ah a thi a; nimin khan Shillong-ah amah thlahna hun hman a ni a, vawiinah Aizawlah rawn phurh thlen tum niin, naktukah vui a ni ang.

Rev.Dr CL Rema hi January 13, 1925-ah Thiltlangah a piang a, kum 1949-ah Serampore College aṭanga Intermediate Arts a zawh hnuah St. Paul's College, Calcutta-ah B.A (English) a zir a, chumi hnuah Calcutta University-ah M.A a zo. Amah hi Calcutta Mizo Students president hmasa ber a ni.

A chhungte hnen aṭanga thu dawn danin, CL Rema hi kum 1956-ah IAS-ah a tling a, Mizoram aṭanga IAS-a lut hmasa ber a ni a, Mizo hnahthlak zingah chuan pahnihna a ni. IAS officer nia sorkar hna a thawh hnuah USA-ah Pathian thu a zir a, chumi hnuah missionary-in a chhuak a; a hnathawhte avangin doctorate degree hlan (confer) a ni.

Rev.Dr CL Rema te unau hi mipa leh hmeichhia pathum ve ve an ni a; a unaute zingah Baptist pastor Rev.Dr CL Hminga, Lok Sabha MP ni mek leh Mizoram minister hlui CL Ruala-te an tel.