Aizawl kawngpui zauh dan tur sawiho

Aizawl khawpui chhunga kawng péngṭhuam leh kawngpui ṭhen-khat zauh leh khawpui chei dan tur ngaihtuahin, nimin khan UDPA minister Zodintluanga hoin a pisaah PHE, PWD, Power & Electricity, BSNL, Traffic Police, UDPA, AMC aiawhte an ṭhukhawm.

Zodintluanga chuan, Aizawl khawpui siamṭhaa chei turin hun rei tak aṭangin ngaihtuahna senga hmalak a nih tawh thu sawiin, "Hmun ṭhenkhat phei chu a hmunhma ngei enfiah hoin thlithlai a ni tawh. Tunah hian Bawngkawn, Hunthar Veng, Republic Veng (Pi Pangi péng) leh Dawrpuia damdawi-in hnuai Thâna péngte hi hmalak hmasakna turin chhawpchhuah a ni. Hna thawhna tura ruahman cheng nuai 650 pawh a hmin tawh avangin thawh vat a ngai," a ti.

Zodintluanga chuan, Aizawl khawpui kawng péngṭhuamte zauha siam rual a nih chuan mipui tan chhenfakawm tak a ni dawn tih sawi-in, "A lan dan leh sawi mai aiin sut kuak tur leh hna thawh ṭan hma aṭanga chinfel tur a tam tih hre reng chunga hmalak a ni. Fûrpui zawh hun November aṭanga hnathawh
ṭan ka duh," a ti a; November aṭanga hna thawh thei tur inbuatsaih turin department hotute a hrilh.

Meeting-a an rel danin, kawng péng-ṭhuam eh khawpui chhung thuam mawi hna leh a tâwt lai siam rual hna thawk tur hian PWD-in hna bul an ṭan hmasa dawn a ni.