KHAWTHLIR

OPD chawlh

Mizoram sorkar chuan Mizoram puma sorkar damdawi-ina Out Patient Department (OPD)-te tan, thla tina Inrinni hmasa ber leh Inrinni vawi lina bakah, December 24 leh 31-te chawlh-ah a puang.

Thisen pe

Johnson College chuan Nilaini khan an college-ah blood donation camp an huaihawt a, Aizawl Civil Hospital tan mipa 112 leh hmeichhia 17-in thisen unit 129 an pe.

Engineering seat

Higher & Technical Education department chuan thuchhuah siamin, engineering line-ah Mizoram state quota (Central pool) hnawhkhah loh a la awm thu a tarlang a, "Class XII (PCM pass, JEE paltlang kher lote tan pawh office hun chhungin HTE Technical Wing-ah August 9, 2016 thleng ngaihven theih a ni," an ti.

Motor pe

General Insurance Corporation of India (Re-insured) company chuan, Lok Sabha MP-in model village atana a thlan Khawlailung leh Rajya Sabha MP-in model village atana a thlan Chhiahtlang khaw hnenah bawlhhlawh paihna tur motor (sanitary truck) an pe. Motor hi nimin khan Serchhip DC conference hall-ah khaw pahnih VCP-te hnenah hlan a ni.

Office hawng

Serchhip District Agriculture Complex-a cheng nuai 20 senga sak, Agriculture Technology Management Agency (ATMA) office building thar chu nimin khan Agriculture director Dr C Lalzarliana'n a hawng.

Chawlh puang

Mizoram sorkar chuan August 26, 2016-a local council bye-election
neihna tur - Chhinga Veng, Chite leh Mission Venga vote thlak turte tan vote an thlak theih nan inthlan ní hi sorkar chawlhah a puang.

Jubilee lawm

Kawnpui Chhimveng branch YMA chuan, Nilaini khan an veng hall-ah an din champha 75-na, platinum jubilee an lawm a, bialtu MLA Hmingdailova Khiangte-in a hmanpui.