RSBY-ah chhungkua 1,94,886 inziak lut

Rastrya Swasthya Bima Yojana (RSBY) State Level Review Meeting cum Grievance Redressal chu, Health secretary Lalrinliana Fanai hoin nimin khan IPR Conference Hall-ahneih a ni a; kum 2016-17 chhung atan RSBY-ah chhungkaw 1,94,886 an inziak lut tawh tih an tarlang.

Review meeting-ah hian district hrang hrangte hmasawnna leh harsatna tawhte sawiho a ni a; district-a RSBY khawihtute'n an district dinhmun an sawi.

Meeting-ah hian RSBY leh Health Care Scheme buaipuitu company-in bill an pek muan vanga harsatna awm thu te, mipuiin inziah luh leh thlalak an ngaihsak tâwk loh ṭhin thu te, inziah luh hun laia inziah luh ngaihsak lo, hun tawp hnua beisei leh site'n harsatna tam tak an thlen thute sawiho a ni.

Meeting-a tarlan danin, RSBY-ah hian kumin 2016-17 chhungin chhungkaw 2,44,280 inziah luhtir hman tum a ni a, tunah hian chhungkaw 1,94,886 (80%) an inziak lut tawh. Kum 2015-16 chhung khan RSBY-a inziak lutte damlohnaa inenkawlna senso Rs. 8,62,73,335 an pe chhuak.

Mizoram State Health Care Scheme-ah chuan kum 2015-16 chhung khan chhawr
ṭangkaitu mi 1,16,322 an awm a, inenkawlna senso Rs. 12,80,26,231 pek chhuah a ni.

RSBY hi sorkar laipui scheme, health insurance chi khat a ni a, kum 2010-ah Mizoramah kalpui ṭan a ni. RSBY hian BPL chhungkuate leh street vendor-te a huam a; kumin 2016-17 chhung atan enrolment zawh tawh niin, inziak lutte chu smart card pek an ni.

RSBY-ah hian Mizorama sorkar damdawi-in zawng zawng bakah, private hospital zingah Aizawl Hospital, Care Hospital leh Nazareth Hospital tih loh zawnga inenkawlna senso, Rs. 30,000 thleng peksak theih a ni.

Meeting-ah hian Health Principal Director, Health Services Director, Hospital & Medical Education Director, district hrang hranga CMO, sorkar damdawi-ina medical superintendent-te leh mimal damdawi-in aiawhte an tel.