BSNL hotute'n an hmalakna CM an hrilh

Hmarchhaka BSNL hotute chuan, chief general manager Kamal Kumar Saxena hoin chief minister Lal Thanhawla a pisaah an kâwm a; Mizoram mobile phone leh internet service tihchangtlunna atana an hmalaknate an hrilh.

Chief Minister chuan, khawvel ṭhang zelah inbiakpawhna chu thil pawimawh ber, thil dangte pawh a chunga innghat a nih thu sawiin, "Tun dinhmunah kan telecom infrastructure-te hi duhthusama ṭha a nih loh avangin mobile phone leh internet service-ah ram chhung hmun dangte kan phâk lo hle a ni," a ti.

Kamal Kumar Saxena chuan, BSNL-in Mizoramah a dinhmun leh an service pek chhuahte tichangtlung tura hma an lak mek dante sawiin, "BSNL chuan hlâwkna ûm vak loa mipui rawngbawl hna leh mipui tana thawh leh public leh social services pek hi kan ngaih pawimawh ber a ni," a ti a; chak zawka mipui tan an thawh zel thei nan an khawl leh bungruaahte entry tax âwl turin CM an ngen.

Chief Minister zawhna chhangin Kamal Kumar Saxena chuan, Bangladesh kaltlanga hmarchhak pumpuiin internet inthlun zawmna chak zawka a neih theih nan tuipui chhunga submarine cable line hman ṭangkai nan Agartala-ah a ruhrel tur bunfel tawh a nih thu a sawi a, "Agartala leh Guwahati chu thlunzawm a ni tawh," tiin, line chu Mizoram pawhin a chhawr thei nan Aizawl leh Guawahti inkara 10 Gbps line pakhat chu siam mek a nih thu leh August thla tawp lamah zawh beisei a nih thu a sawi.