Tlawng tui pump-na thar siam dawn A puitlin hunah darkar 24 tui pek theih beisei

PHE minister Zodintluanga chuan Inrinni khan Aizawl Press Club-ah thuthar thehdarhtute kâwmin, SIPMIU hnuaiah Aizawl khawpui châwmtu turin Tlawng lui tui pump-na tur siam thar a ni dawn tih a puang a, "A puitlin hunah chuan ni khatah darkar 24 chhung tui pek theih kan beisei a, connection tih man a awm lo ang," a ti.

Minister Zodintluanga chuan, tuna Aizawl khawpui châwmtu Greater Aizawl Water Supply Scheme Phase I leh II-te'n ni khata Tuikhuatlanga tui an pump chhoh theih zat chu 34.80 MLD a nih thu a sawi a; chu chuan Aizawl mipui pung zel a châwm zawh loh thuai dawn avangin Aizawl châwmtu tur tui lakna tur project thar duan a nih thu a sawi.
PHE Minister-in a sawi danin, North Eastern Region Capital Cities Development Investment Prog­ramme (NERCCDIP)-a Tranch-3 hnuaia Project 3-ah ruahmanna siam a ni. Mithiamte chhût danin, tuna GAWWS Phase I&II hmanga Aizawlin tui a hmuh chu 34.80 MLD a ni a; chutih laiin kum 2018-a Aizawl mipuite mamawh zat tur chu 54.63 MLD a ni. Kum 2033-a mamawh zat tur chu 71.22 MLD leh kum 2048-a mamawh zat tur chu 88.92 MLD-a chhut a ni.
SIPMIU chuan NERCCDIP hnuaiah kum 2030 thlenga Aizawl mipui mamawh phuhruk thei turin water supply project an siam a, chuta tan chuan cheng nuai 28,786 ruahman niin pawm a ni tawh.
Tuna Aizawl châwmtu tui pump-na hmun, Tlawng lui Reiek kai aṭanga lui mawng lam km. 8 vela hlaa Setlâk an tih hmunah tui pump na chu bun tum niin, a project chu kum 2018-a zawh tura tih a ni. Setlak hi Laipuitlang aṭangin km. 12-a hlá a ni.
Zodintluanga chuan, Tlawng lui Setlak aṭanga tui pump-na tur project chu zawh theih a nih chuan, tuna GAWSS Phase I leh II-in ni khata tui an pump theih zat aia tam, 37 MLD pump chhuah theih a nih tur thu a sawi a; zawhna chhangin, "Kawngpui dungah pipe line lian a kal ang a, chuta ṭang chuan chhungkaw tinin tui an la ang a, an duh hun hunah an herh haw thei dawn a ni," a ti.
PHE Minister chuan, kum 2009-2018 chhungin Aizawl bakah, Shillong, Gangtok, Kohima leh Agartala-ahte Asian Development Bank sum hmangin NERCCDIP kalpui tura ruahman a nih thu sawiin, "Khawpui panga atan cheng vbc. 1390.64 ruahman a ni a, Aizawl tihhmasawnna tura sum ruahman chu cheng vbc. 330.07 a ni," a ti.
Zodintluanga chuan, "NERC­CDIP Tranch-I ah Mizoram sor­karin ṭha takin kan ti a, state dangin an tih ṭhat ve loh avangin duh angin kan kal chak thei lo zawk a ni," a ti a; a thawk ṭha lo zual - Kohima, Shillong leh Gangtok-te chu project tihtawpsak a ni a, an chanái sumte chu Aizawl leh Agartala hnenah pek belh niin, Aizawl atana sum dah pawh cheng vbc. 690.27-ah a kai chho ta niin a sawi.
SIPMIU project director Val­buanga sawi danin, NERCCDIP Tranch-I chu May 2009 - October 2015 chhunga thawh tur a nih laiin, Mizoram chuan June 2012-ah a zo a; Tranch-I ah hian tuizem lian (zonal tank) pasarih, RCC hmanga siam a ni a, tui meter 15,000 vuah a nih bakah, tui tihthianghlimna (chlorinator) pahnih siam zawh a ni. Zodintluanga chuan, "Tranch-1 ah hian cheng nuai 3517 hman tur a awm laiin, nuai 27 senga zawh a ni," a ti.
Tranch-2 chu July 2011-ah ṭanin, June 2018-a zawh tur a ni a, cheng nuai 6,580.92 ruahman a ni. Tunah hian hna thawh zawh tawh leh thawh mek eng emaw zat a awm. Hna tam ber chu water supply tihchangtlunna a ni a; a pui ber pakhat chu main reservoir aṭanga zonal tank-a tui pekna pipe lian (23.44 km.)-a thlak te, zonal tank aṭanga tui pek chhuahna tihṭhatte a ni.
Tranch-2-ah hian sewerage system kalpui a ni bawk a, Sewage Treatment Plant sak mek a ni a, sewer line km. 46 phum turah km. 3.67 phûm tawh a ni. Hmun parukah community toilet sak zawh tawh leh sak mek pahnih a awm.
Tranch-3 hnuaiah chuan Tlawng lui Setlak aṭanga water supply scheme bakah, solid waste management leh sewerage system kalpui tur a tel a, December 2012-ah ṭan niin, December 2018-a zawh tur a ni.
Water supply scheme atan cheng nuai 28,786 ruahman a ni a; Septage Management, Wastewater Treatment Plant leh a dangte siam nan cheng nuai 2,226.94 ruahman niin, Municipal Solid Waste Resource Management System atan cheng nuai 3,308.80 ruahman a ni bawk.