Pawl 6-in thisen unit 225 an pe
June 12 leh 13 khan Mizoram hmun hrang hrangah pawl parukin thisen unit 225 an pe.
Inrinni khan Bethlehem Veng YMA chuan YMA Day pualin Aizawl Civil Hospital tan thisen unit 65 an pe a, a petute mipa 53 leh hmeichhia 12 an ni a; Serkawn Branch YMA pawhin Christian Hospital, Serkawnah unit 41 an pe a, a petute mipa 27 leh hmeichhia 14 an ni.
Inrinni vek khan Kawnpui Bial KṬP chuan Synod Hospital-ah thisen unit 40 an pe a a petute mipa 38 leh hmeichhia pahnih an ni. Mizo Chelsea Supporters Club member mipa 16 leh hmeichhia palite'n Aizawl Civil Hospital-ah thisen unit 20 an pe bawk.
AVBD, Serchhip Branch chuan Inrinni khan Serchhipah World Blood Donor Day an hmang a, thisen pe ṭhate hnenah chawimawina an hlan. Blood donation camp an nei nghal a, mipa 14 leh hmeichhia pakhatin thisen an pe a ni.
June 12 khan Lairam Isua Krista Baptist Kohhran ṭhalai pawl, Paithar pastor bialte chuan Lawngtlai District Hospital-ah thisen unit 44 an pe bawk a, a petute mipa 39 leh hmeichhia panga an ni.