Naktukah Property Tax lak tan a ni dawn

Aizawl Muncipal Council chuan Mizoram sorkarin dan a siam, The Mizoram Muni­cipalities (Second Amendment) Act, 2015 angin naktuk, June 16, 2015 aṭangin Aizawl khawpui huam chhungah Property Tax a la ṭan dawn.

Property Tax hi AMC Ward-I aṭangin khawn ṭan a ni dawn a; AMC office, Ṭhuampuiah mahnia kalin pek theih a ni bawk ang.

AMC chairman CT Zakhuma chuan, Property Tax chu in neitute'n anmahnia an chhûtna aṭanga lâk tur (self assesment) a nih avangin sawisel zuina a awm a rin loh thu a sawi a, "A him tâwk angrengin kan hria," a ti a; Land Revenue & Settlement department pawhin hman aṭangin chhiah a la reng tawh a, chhiah pek chungchanga buaina awm chingfeltu tur Appellete Tribunal din a awm lem lo niin a sawi.

AMC executive councillor (Revenue) Hmingthanzami sawi danin, Thawhlehnia AMC-in Property Tax a lak ṭanna tur hi Ward-I huam chhung, Durtlang Leitan leh Durtlang North-ah a ni dawn a; Ward-I ah hian Selesih, Zuangtui, Durtlang, Durtlang North leh Leitan-te an awm.

Property Tax khawn tur hian thawktute chu team hnihah in­ṭhenin, a hrangin an kal dawn a; chhiah petu turte awlsam zawk nan an vengah pekna hun an siam dawn a ni. A duh tan AMC office-ah pawh pek theih a ni ang.

Property Tax hi Aizawl khaw­puia in leh lo nei zawng zawngte aṭanga lak tur a ni tih sawiin, Hningthanzami chuan, "Property Tax lak hnuah chuan Revenue department-a mipuiin leiman, chhiah an pek ṭhin kha pek a ngai tawh dawn lo," a ti.

Revenue department kal­tlanga sorkarin sum a lak luh ṭhin chu AMC-in Property Tax a lak hmangin Aizawl hmasawnna atan an hmang dawn tih sawiin, "Property Tax-ah hian in chhung bungrua teh tel tur a ni lo a, in leh inhmun hlutna aṭang chiaha chhiah lak tur a ni," a ti.

Property Tax lakna tur hian Aizawl khawpuia veng hrang hrangte chu zone pariat - Zone A, B, C, D, E, F, G leh H-ahte ṭhen a ni a, zone A-a in leh ram hlutna a sang ber a, zone H-a hlutna a hniam ber a ni.