Khakchangpara camp-a Bru-te endik ṭan dawn

Tripura-a Bru refu­gee camp paruk aṭang­a Mizoram Bru-te a tahtawla lak kirna tur­ah Inrinni khan Khakchangpara camp-a mite lak kîr dan tur buaipui turin Lunglei SDC C Lalzuil­iana leh Kolasib SDC Lalhmingliana ten Kân­hmun an pan a, nimin khan Mamit SDC Victor Lal­awmpuia'n Kanhmun a pan bawk. Nimin vek khan Khakchangpara an thleng nghal a ni.

Thu dawn danin, Bru refugee camp aṭanga Bru awmte lak letna tura tih tur pawimawh hmasa chu Mizoram mi dik tak an ni em tih enfiah hmasak a ni a; enfiah hna hi vawiin chawhma dar 10 aṭanga thawh ṭan a ni ang. Mizoram sorkar official-te pui tur hian Tripura-a Panisagar sub-division SDM leh deputy collector bakah, Damcherra Police Station-a OC-te beisei an ni.

Khakchangpara camp-ah hian Mizoram Bru let kîr duhte chu vawiin aṭanga June 18 thleng endik an ni ang a, kîr duhte chu June 22-26 inkarah Mizoramah lak lêt an ni ang.

Khakchangpara camp-ah hian chhungkaw 172 an awm a, relief camp paruk zingah mihring pawh an tlemna ber a ni. Mizoram Bru Displaced People Forum (MBDPF) hruaitute chuan, sorkar official-te puihbawm an tum thu leh Mizorama let chu an dodal loh thu an sawi a; chutih rualin, Mizorama let leh let loh chu mimal duhthlanna a nih thu an sawi.