CYMA-in Aizawlah halpuah leh halmawi an vâi

Central YMA chuan nimin December 30 chawhnu lam khan Aizawl Bazarpui leh a chhehvelah halpuah leh halmawi zuar an awm leh awm loh an vâi a, halpuah/halmawi zuar hmuh leh man an nei lo.

Halpuah/halmawi zuar an awm leh awm loh enfiah tur hian YMA hruaitute chu CYMA office bearer-te kaihhruainain hlâwm ngaah an inthen a; Chanmari leh Lammual hmar lam gate inkar, Bazarpui leh a chhehvelahte dawr eng emaw zat an enfiah a ni.

Enfiahnaah hian Central YMA hruaitute bakah, Dawrpui, Zarkawt, Chanmari, Electric Veng, Chhinga Veng leh Saron Veng branch YMA hruaitute an tel a; Aizawl Police Station atangin police-te'n an tawiawm bawk.

Halpuah/halmawi zuar an awm leh awm loh enfiahna hi CYMA leh Police-te chuan December 21, 2024 khan an lo nei tawh bawk a ni.

Central YMA chuan nimin vek khan Aizawla hmun hrang hrangah halpuah leh halmawi that lohzia inzirtirna leh hal lo tura inngenna an puangzar bawk.

CYMA chuan, "Kum thar lo thleng tur hlim taka kan hman theih nan mipuite duhsakna kan hlan a, sorkar phal loh thil halpuah leh halmawi hâl lo tur leh zuar lo turin mi tinte kan ngen. YMA branch hrang hrangte pawh mahni huam chhung theuhah theihtawpa tan la turin kan ngen nawn leh a ni," an ti.