MPCC-in Dr Manmohan Singh sûnna hun an hmang

Mizoram Pradesh Congress Committee (MPCC) chuan nimin December 30, 2024 Lal Thanhawla Auditorium, Congress Bhavan-ah prime minister hlui Dr Manmohan Singh sùnna hun an hmang.

Sùnna inkhawm hi MPCC vice president RL Valla’n a kaihruai a, Ronald Sapa Tlau-in Dr. Manmohan Sigh chanchin a sawi. MPCC president Lal Thanzara’n sùnna hun a hmang a, All India Congress Working Committee member Lal Thanhawla'n thu a sawi bawk.

MPCC president Lal Thanzara chuan, Dr Manmohan Singh chu economist ropui a nih thu sawiin, "India ram sum leh pai dinhmun siamthatu a ni. Mizoram pawh min duhsak em em a, Planning Commission a awm lai pawha special package hmanga NLUP atana cheng vbc 2,800 min petu a ni," a ti.

Dr Manmohan Singh te chhungkua chu mi inngaitlawm leh entawn tlak an nih thu sawiin Lal Thanzara chuan, "A nupui Gursharan Singh hian a pasal PM a nih hnuah hun rei tak Maruti 800 a khalh a, han intih VIP hi an ngaihsak lo. A fanu hian research a beih laiin Mizoram thingtlang khuaah a tâl ve nâw nâw thin a, intihlen a tum ngai lo," a ti bawk.

CWC member Lal Thanhawla chuan, “Hetiang mi ropui, Mizoram min duhsaktu kan chán hi a vanduaithlak hle," a ti a; Dr Singh-a thil tihṭhat a tam hle a, a chanchin atangin a ropuizia a lan chhuah zel thu a sawi.

Lal Thanhawla chuan, Dr Manmohan Singh hnuaiah anti-terrorist law tam tak siam a nih thu a sawi a, “Vawi nga lai Mizoram a rawn tlawh a, politics thilah vawi hnih niin, a dang chu chhungkaw thil a ni. Tun thlenga Mizo mipuite'n kan chhawr tangkai em em MGNREGS leh RTI Act te hi a hun laia duan chhuah leh a bultumtu a ni," a ti.