YMA Day hlim taka lawm a ni

YMA Day vawi 81-na chu nimin khan Mizoram chhung leh pawna YMA branch hrang hrangte'n hlim takin an lawm.

YMA Day lawmna programme hi branch ṭhenkhat chuan June 13, Inrinni zan aṭangin an ṭan a, a lawm nana ruai ṭheh pawh branch eng emaw zat an awm.

YMA branch tam zawk chuan YMA Day lawm nan zing karah khua/veng chhung tihfai hnatlang an nei a, nilenga hnatlang ṭhahnem tak an awm bawk. Chhun lama intihhlimna hun hmang an awm bawk a, lengkhawm zai leh hnam lama inelna hun hmangte leh infiamna huna hmang an awm a; nizan lama hun hmangte an awm bawk.

YMA Day hi branch tam tak chuan mite ṭanpuina ni-ah an hmang a, khawsak harsa zawkte hnenah ṭanpuina an hlan. Aizawla Republic Veng branch chuan YMA Day lawm nan nimin khan chhungkaw harsa 11 hnenah ṭanpuina pawisa Rs. 26,000 an sem ral a; Synod Hospital tan thisen unit 100 an pe a, a petute chu mipa 96 leh hmeichhia pali an ni.

Aizawla Chanmari branch chuan an venga chhungkaw pariat hnenah ṭanpuina pawisa an pe a; Guwahati, Kolkata, Vellore, Delhi leh Mumbai-a Mizo welfare-te hnenah puan 20 ṭheuh an pe. Voluntary blood donation lama a thawh ṭhat vangin an veng pa Lalbiakthanga Pachuau an chawimawi bawk.

Thingsai branch chuan YMA Day pualin Thingsai tui lâkna Zotuithiang hnárah thing ṭiak 700 chuang an phun a, thing phun hnatlangah hian member 300 vel an thawk chhuak. Kulikawn branch chuan an venga damdawi-in pathumah damlote tan artui an sem.

Khawzawl Vengthar branch YMA chuan YMA Day pual hian Khawzawl damdawi-ina damlo, damlo awmpuitute leh damdawi-ina hnathawkte tan zanriah an buatsaih.

Shillong-a Madanrting branch chuan YMA Day hi Mizo High School Ground, Happy Valley-ah nimina an hman bakah, June 13 khan an hmang tawh a; niminah chuan 'Shillong Mizote thawhhona leh ram leh hnam tana mawhphurhna' tih thupui an zirho a, resource person chu Shillong Mizoram House-a deputy resident commissioner Jacob Lalawmpuia a ni.

Central YMA hruaitute chuan branch hrang hrangah YMA Day an hmanpui a; CYMA president Lalbiakzuala chuan Aibawk branch leh Bawngkawn South branch-te a hmanpui a; vice president Vanlalrema Rokhum-in Saitual Joint YMA hmanpuiin, CEC member pathumin an ṭawiawm.

CYMA general secretary Vanlalruata'n Tuikual South, Tuikual North leh Laipuitlang branch-te a hmanpui a; assistant secretary Lalhmachhuana'n Tuikhuahtlang, Chaltlang North leh Electric Veng branch-te a hmanpui. Treasurer J Lalsailova'n Mission Veng YMA North branch a hmanpui a, finance secretary Lalrochuanga Pachuau-in Dampui branch a hmanpui bawk.