Khakchangpara camp-ah Bru inenfiahtir an awm lo

Tripura-a Bru relief camp aṭanga Mizoram Bru lak let turah nimin aṭang khan Khakchangpara camp-ah Mizoram mi lâk kîr turte enfiah tum a ni a, mahse tlai dar 4 thleng­in Mizorama kîr duha inenfiahtir an awm lo.

Thu dawn danin, Bru lak let tur enfiah hna hi Mamit SDC Victor Lalawmpuia, Kolasib SDC Lalhmingliana leh Lunglei SDC C Lal­zuiliana leh an thawh­puite'n chawhma dar 10 aṭanga tlai dar 4 thlenga verification camp an hawnah Bru inlan an awm lo a ni.

Khakchangpara camp-a Bru-te enfiahna hi June 18 thleng hawn a ni ang a; lak let hun tura ruahman chu June 22-26 inkarah a ni.

Khakchangpara-a Mizoram Bru Displaced People Forum branch secretary BP Chhorkhy sawi danin, an camp-a MBDPF office-ah Pathianni khan mipui an kokhawm a; Mizoram sorkarin anmahni lak kîr dan tur a ruahmante leh Mizorama an kîr huna chhawmdawlna an dawn turte an hrilhfiah a ni.