KHAWTHLIR

Kawng tlahniam
NH-54, Aizawl-Sairang kawngpuia Hunthar Vengah tun hma lama lei tlak hniamna laiah kawng a tlahniam leh. Motor lian rit phurte an kal thei hram hram a, a inchhâwka kal a ngaih avangin traffic a jam phah ṭhin. Kawng dinhmun hi PWD hotute leh traffic police-te'n an vil zui reng a ni.

In saksak
Mamit district-a Bungṭhuam branch YMA chuan nimin khan YMA Day pualin an khuaa khawsak harsa mi pakhat in tur an saksak. In hi ft. 20X10-a liana sak a ni a; hnatlangte thingpui inna senso atan bialtu MLA Lalrinmawia Ralte-in Rs. 3,000 a pe. Lawng-tlai AOC Veng YLA branch pawhin nimin khan an veng chhunga hmeithai pakhat in an saksak a a; bialtu MLA C Ngunlianchunga'n Rs. 5000, bialtu MDC Vanlalṭhaliana'n a chung tur rangva leh Central YLA-in Rs. 1000 leh silpauline an tum a ni.

Ph.D hmu thar
ZR Ṭhasangzuala s/o ZR Chullova, Zemabawk chuan Mizoram University aṭangin doctor of philosophy a hmu thar a, a thesis chu 'Assessment of Water Quality in Aizawl City, Mizoram and management Strategies' tih a ni a; amah hi PHE department-a SDO hnathawk mek a ni.

Hmeithai in
Lunglei Bazar veng YMA-in hmeithai pakhat in an saksak chu ZENICS chairman Chalrosanga Ralte, MLA-in nimin khan a hawng. In hi a dung ft. 20 leh a vâng ft. 12 a ni a, a sakna atan bialtu MLA-in Rs. 40,000 a thawh bakah, Lunglei Bazar Veng branch YMA leh mi tlawmngaite'n an thawh belh a ni.

Zanriah buatsaih
Saron Veng branch YMA chuan YMA Day-a an tih ṭhin danin Cancer Hospital, Zemabawk leh Chawnpuia Ṭawngṭai Bethel Camping Centre-a awmte tan nimin khan zanriah an buatsaihsak.