MSB-in income certificate dik taka Pe chhuak turin DC-te ngen a tum

Mizoram Scholarship Board (MSB) hotute chuan, scholarship chu a dil tur dik takte'n an dil theih nan 'income certficate' dik taka pe chhuak turin district tina DC-te hnenah ngenna thlen an tum.

MSB hotute hnen aṭanga thu dawn danin, scholarship dilnaa income certifcate an thil telah, scholarship dil tura chhungkuain kum khata an sum lak luh tur chin dik taka a inziah miau chuan hnâwl ngawt theih a ni lo a; chuvangin, income certifcate dik taka pek chhuah a nih theih nan DC tin hnenah ngenna thlen a tum a, file a kal mek a ni.

MSB hotute sawi danin, scholarship dil zingah sorkar hnathawk, thiamna sang zawk zir belh tura training lehte pawh eng emaw zat an tel ṭhin a; chungte pawh chuan scholarship dil theihna turin income certifcate an nei vek ṭhin.

Hetih lai hian, MSB hotute chuan, Mizoram University-a zirlai zingah dil thei lo chunga scholarship dil an awm ṭhinin an hria a, hemi chungchang hi MZU hotute an hrilh tawh a ni.

Vanglaini zawhna chhangin MSB hotute chuan, kumina scholarship hmuh tur chu sorkar laipuiin a tum vek dawn leh dawn loh an la hriat loh thu an sawi a, "Kan lehkha hmuh hmasakah chuan 100% funding tur a in ti a, a hnuah 90/10 tur angin an rawn ti leh a; chuvangin, tun dinhmunah chuan 100% funding a nih dawn leh dawn loh sawi thiam a har hrih a ni," an ti.