YMA hi tlawmngai pawl a nih avangin Politics-in a tibuai tur a ni lo: CYMA President

Central YMA president Lal­biakzuala chuan, YMA chu politics rawng kai lo, tlawmngai pawl a nih avangin hna a thawhnaah politics-in a tibuai tur a ni lo tih a sawi a, "YMA chu rorel lai party thunun theih loh, eptu party-te fuihpawrh theih loh a ni tur a ni," a ti.

Lalbiakzuala hian nimina Aibawk leh Sateek khuaa YMA Day a hmanpuinaah thu sawiin, "Ram leh hnam tana thil ṭhaah YMA-in sorkar ṭawiawmin, a finchhuah tur a ni a, chu chu dan bu-ah pawh a inziak," a ti a; ram leh hnam tana ṭha lo leh pawi turah chuan sorkar thil tih pawh ni se huaisen takin YMA chuan a dodal ngam tur a nih thu a sawi.

CYMA President chuan, Zofate inpumkhatna chu YMA hnathawh pawimawh tak a nih thu sawiin, inla hrang zawnga awm lo a, inpumkhat taka Mizoram chhunga khawsaa chengho turin Mizo hnam hrang hrangte a sawm a ni.

Lalbiakzuala chuan, ram leh hnam humhalhna atan YMA-in Chakma chhiarpui a nei dawn tih sawiin, "Mi ṭhenkhatin Central YMA chu Chakma chhiarpui nei lo turin nawr mah se, ram leh hnam humhalh nan Chakma chhiarpui hi neih ngei a ni dawn. Dan loa Chakma lo lutte hi chak taka dap chhuah an ngai a, ram dang mi, Chakma-te chhiarpui neih duh lote hian dan loa ram dang aṭanga lo lut hi an thlawp tihna em ni?" a ti.

CYMA President sawi danin, pawn lam leh chhung lamah Mizoram leh Mizo hnam tibuaitu an awm avangin YMA chuan 'Ram leh hnam humhalh' tih chu kumpuanah a hmang nawn leh a ni.