Kelkang khuain zirna an kalpui danah harsatna lian tham tak an la tawk lo

Kelkang khuaa Pathian thlaraua harhna thleng mek vanga mi tam takin Kelkang pan khawm avangin zirna in hrang hrangte'n harsatna an nei a; nimahsela tun thlengin sikul an kal tluang a, harsatna lian tham an tâwk lo niin an sawi.

Kelkang High School headmaster Rosiamliana chuan, an khuaa hlimna chhimtu mikhual an tam zual changin sikulah riah a ngaih avangin harsatna an tâwk deuh tih sawiin, mikhual an tam avangin sikul hun pangngai zawm vek a harsa deuh niin a sawi a, chutih rualin, tluang takin an la kal zel thei tih a sawi a ni.

Rosiamliana chuan, chhuna class lâk tibuai tur khawpin mikhualin puanthuah an dah ngai lo niin a sawi a, "Naupangin chaw an ei tlai avangin kal hma thei lo an awm zauh zauh a, hriatthiam ngai an awm a, in lama home work kan pekah pawh mikhual an ngah avangin zir a harsa deuh. Mahse, inkhawm reh laiin lehkha an zir ve mai a, naupang azir a ni ve bawk," a ti.

An khuaa hlimna avangin sikul naupangte result a chhiat phah lo nia sawiin, Rosiamliana chuan, "Kuminah HSLC-a candidate panga kan neihah mi pathum an pass a, nikumah pawh hetiang deuh bawk hi kan ni a, nghawng a nei lem lo," a ti.

Kelkang Middle School zirtirtu Hmangaih­kima chuan, zirna tluang takin an kalpui thei niin a sawi a, ruahsur nasat zanah mikhualte chu an sikulah zan hnih an riak tih a sawi a; Nilaini leh Ningani chu mikhual tam zual hun a nih avangin in lamah naupangte'n lehkha an zir ṭha vak thei lo a, home work an pekah pawh ngaihnathiam deuh ngai an awm tih a sawi.

Hmangaihkima chuan, Kelkang MS-ah zirlai 52 an awm tih sawiin, "Kan zirlaite hi sikul bànah mikhual semin an buai ve ṭhin a, chumi tih loh chu harsatna a awm lo," a ti a; mikhual an ngah avangin zirtirtute zawk chu an kal hma thei lo niin a sawi bawk.

Kelkangah hian high school pakhat, middle schhool pakhat, prima­ry school pahnih leh Pres­byterian English Medium School pakhat a awm a ni.

Kelkanga harhna chhimin Mizoram hmun hrang hrang leh leh ram pawn aṭang mi ṭhahnem tak an kal tawh a; Kelkang Kohhran chhinchhiah danin, harhna chhima kal hi mi 1,64,536 an tling tawh a ni. Ni tin mi sang chuang kal thar an awm ziah a, tun karah pawh kohhran hrang hrang aṭangin mi ṭhahnem tak an kal leh dawn a ni.