State páwnah Maggi endiktir tum

Mizorama Maggi noodles rawn lutte mihring hriselna atan a him leh him loh state danga endik tura thawn chhuah tumin, Health and Family Welfare department chu a inbuatsaih mek.

Health department hotute hnen aṭanga thu dawn danin, Mizoramin laboratory a neih loh avangin Assam laboratory-a Mizorama lut Maggi-te endik a nih theihna atan aiawh an intir mek a; an indawr fel hnuah Mizorama Maggi-te chu Assam laboratory-ah endik tura thawn theih beisei a ni.

Hetih lai hian, Health department chuan Mizoram hmun hrang hranga Maggi thawn chhuah tawh, distributor-te'n an lak let lehte chu an enpui mek. Zawhna chhangin Health department hotute chuan, "Mizoram hmun hrang hrang aṭangin an lakhawm ṭha viauin kan hria. Sorkar laipuiin zawrh chhuah a khap tawh avangin hmun dang aṭanga rawn lut tur chu a awm a rinawm loh," an ti.