Property Tax atangin cheng vbc. 5-10 beisei

Aizawl Municipal Council (AMC) chuan Mizoram sorkar dan siam, The Mizoram Municipalities (Second Amendment) Act, 2015 angin vawiinah Property Tax an la ṭan dawn ta a, AMC Ward-I aṭangin ṭan a ni ang. Property Tax aṭang hian kum khat chhungin cheng vbc. 5 aṭanga 10 inkar hmuh beisei a ni.

AMC hotute chuan, Property Tax chu in leh inhmunte aṭangin lak a nih dawn thu leh mipui phurrit thlen lo thei ang bera lak a nih dawn thu an lo sawi tawh a; AMC executive councillor (Revenue) Hmingthanzami chuan, Property Tax chu state sorkarin la tura a tih angin AMC-in a la dawn tih sawiin, "Property Tax hi Land Revenue & Settlement department-in tuna leiman a lak aiin hmun ṭhenkhatah chuan a tlem zawk dawna chhût a ni," a ti.

Property Tax hi chhiah thar hlak ni loin, Land Revenue & Settlement department-in leiman leh Building Tax an lak ṭhin thlâkna a nih thu, AMC hotute chuan an sawi a, "AMC-in a la tawh dawn a, a hming a danglam mai chauh a ni," an ti.

Property Tax hi kum khat chhungin ṭum li pekah hman theih a ni dawn a, pek hun chhung (financial year tawp hun March 31)-a pek hman loh chuan late fee nen pek a ngai dawn. AMC Board of Councillor thutlukna angin, kumin chhung bikah chuan pek tur zat aṭangin 10%-a tihhniam a ni. Chhiah chu ṭum li pekah tlak theih a nih rualin, bat ṭhen phal a ni lo thung.

Property Tax hi a bul ṭan nan vawiin hian AMC Ward-I huam chhungah AMC-a thawkte'n an khawn dawn a, AMC pisaa kal kher loin pek theih a ni ang. Ward-I ah an tih zawh hunah Ward-II ah, chumi zawhah Ward dangah an kal zel dawn a ni. AMC pisa, Ṭhuampuiah mahnia kalin pek theih a ni bawk.

Property Tax lakna tur hian AMC chuan Aizawla in awmte chhiar leh chhinchhiah hna thawk turin Institutional Development Consultancy Firm (IDCF) a ruai a; IDCF chhinchhiah danin, AMC ward 19 chhungah in ding lai 48,344 a awm a, mahse survey neih hnuah in sak thar a awm leh nual tawh avangin chhinchhiah zat aiin a tam hret tura ngaih a ni.

Property Tax lakna atan hian Aizawl khawpui huam chhunga veng tin chu zone pariatah ṭhen niin, zone tin chu an hlutna a inang lo. In bik chu a kum zat te, a dinna hmun te, a sakna hmanrua te, a len zawng leh sàn zawngte hmangin chhiah pek zat tur chhût a ni.

Zone A-a RCC in sq.ft. 5,000-a zau, metre 15-a sang, kawngpui âna awm, kum 10-a upa, a neituin a luah leh mi dangin man cháwia an luah chuan chhiah Rs. 8,100 a pek a ngai dawn. Chutiang in ang chiah chu Zone H-a awm a nih chuan Rs. 4,050 pek tur a ni thung.

Zone A-ah tho kawngpui ânah Assam type in mal din, ft. 30X20-a zau, kum 10-a upa, a neitu chauhin a luah chuan Property Tax Rs. 162 a chawi a ngai dawn a; chutiang chiah in chu Zone H-ah a awm erawh chuan Rs. 81 chawi a ngai thung ang.