CM-in TNT Family Night a hmanpui

Chief minister Lalduhoma chuan December 31, 2024 zan khan Thutak Nunpuitu Team-in an hmuna Family Night an buatsaih a hmanpui.

Inkhawm hi TNT hotupa Sangthankima'n a kaihruai a; Chief Minister hian TNT hnenah blanket 100 leh thawmhnaw eng emaw zat a pe. CM hian TNT-in Krismas an hmanna atan Rs 2,00,000 a lo pe tawh bawk.

Chief Minister chuan, TNT-ah mi beidawng te, fahrah te, riangvai te, mi anglote mumal tak leh inthununna tha tak nen an enkawl avangin thawktute chu fakawm a tih thu a sawi.

Lalduhoma chuan, kum 2024 chhungin TNT Pangpar Huan atangin tha taka chhuak eng emaw zat an awm thu leh ruihhlo laka dama chhuak eng emaw zat an awm chu lawmawm a tih thu leh, kum 2025-ah tam lehzual Pathianin a chhanchhuahtir leh ngei a beisei thu a sawi bawk.

TNT Family Night-ah hian Assembly speaker Lalbiakzama leh bialtu MLA minister Lalthansanga te pawh an tel a ni.