Ruang phurh man lut tawh chin Mizoram sorkarin a pe kim tawh
Mizoram sorkarin September 1, 2024 aṭanga ruang phurh man (bill) a pek sak theih hnuah nimin thleng khan dilna 180 a lut tawh a, bill hi a vaiin Rs 16,36,744 niin, bank account lama buaina awmte tih loh chu kum 2024 Krismas hma khan pek vek an ni.
Social Welfare & Tribal Affairs (SWTA) minister Lalrinpuii chuan, ZPM sorkar chuan an policy-ah ruang phurh man (bill) sorkar mawha dah a telh thu a sawi a, "Budget kan siam a, sorkar aṭangin cheng vbc. 5 kan hmu. September 1, 2024 aṭang khan ruang phurh chu sorkar kutah awmin, January 3, 2024 thleng hian ruang phurh man dilna 180 a lo lut tawh a, bill hi a vaiin Rs 16,36,744 a ni," a ti.
Social Welfare Minister chuan, kum 2024 Krismas hma khan ruang phurh man diltute bank account-ah pawisa thun deuh vek a nih thu leh, IFSC code dik lo leh bank account-a buaina awmte hnenah chauh pawisa an la thun loh thu a sawi.
Ruang phurh man inpek dan chu a awlsam zawk theih dan tur an ngaihtuah zel thu sawiin Lalrinpuii chuan, "State Transport Authority (STA) lamah ambulance hman man (rate) min bituksak turin kan ti a, December 23, 2024 khan a rate tur min siamsak a, khawpui pawn leh town area-ah kilometer khatah Rs 40 (garage to garage) min siamsak a ni," a ti.
STA-in rate a siamsak zûlzuiin December 23, 2024 tlaiah ambulance neitu/khalhtu pawlte leh sorkar hotute an ṭhutkhawm thu leh, STWA Directorate-a an bill theih mai turin pawisa an dah thu minister Lalrinpuii chuan a sawi bawk.
MINISTER THUSAWI DANGTE
• Empanelment tih kan tum a, mahse, tender tih a ngaih avangin tunah chuan STWA kutah kan dah rih.
• Motor dang pawhin ambulance rate hian an bill thei tho a, pawisa hi lak chhuah (draw) sa vek tawh a ni a, SWTA-in an kawl vek tawh.
• Ambulance/motor neitute bank account-ah dan anga an bill vek hnuah pawisa thun zung zung theih turin ruahmanna siam a ni.
• Ambulance pawl president VL Ngheta (7005281560) leh secretary Nunhlima (9774464933)-te hnenah ruang phurh tur a awmin biak mai tur a ni.
• Inkaihhruaina siam a ni a, chu'ng zingah chuan ruang phurh tur finfiah (verify)-tu tur - VC/LC leh department officer-te an awm.
• Ruang phurh man hi mitthi chhungte'n buaipui tawh loin, a phurtu ambulance/motor-te'n SWTA Directorate-ah an buaipui tawh dawn.