An phû tâwka action lâk ngei a ṭul - Home Minister

Home minister K Sapdanga chuan thuchhuah siamin, sorkar thupek zâwm duh lo leh, kohhran leh YMA-te runluihtute'n tun hnuah an tih tawh loh nan an lakah an phû tawk action lak ngei a ṭul thu a tarlang.

Sorkarin hâlpuah leh hâlmawi a khap a, YMA, kohhran leh media-te'n an thlâwp bakah, Congress party pawhin an thlâwp thu an puang tih tarlangin K Sapdanga chuan, "Sorkar thupek hi politics game emaw ti pawl an awm a, mipuiin an zawm ṭhat chuan eng pawl emaw hmingṭhatna, eng pawl emaw mualphona ni dawna hre tlat pawl an awm a, kohhran leh YMA sûkthlêk záwng apiang runluih ṭul ti tlat mi tlemtê an awm bawk. Hengho hian ṭhahnemngai takin halpuah kha an hâl ta a ni ber," a ti.

Home Minister chuan, December 31, 2024 zanah halpuah/halmawi hâltu an tam lem lo tih sawiin, "Veng khatah in panga bawr vel an ni," a ti a; halpuah a puah nasat laiin boruak bawlhhlawh zawng tehna Air Quality Index-ah 115 a ni a, kum hmasaah chuan 597 a nih thu a tarlang.

Sorkar thupek zâwm duh lo, kohhran leh YMA-te runluihtute chu chhinchhiah tham an nih thu tarlangin K Sapdanga chuan, "Chhui chhuah harsa lo tak an nih hmel. Tun hnuah an tih tawh loh nan leh, thupek zâwmtute thlavâng hauh nan an phu tâwka action lak ngei chu thupek chhuahtute tan tihmâkmawh a ni ngei ang," a ti.