Aizawlah hâlpuah hâl case 33 ziak lut; Police-in hâlpuah hâl an la bawhzui zel

Kum 2024 Krismas leh kum thar 2025 vuakvetah sorkar chuan halpuah leh a kaihhnawih zawrh leh hâl a khap a; December 31 zanlai aṭanga kum thar 2025 lawmna atana Aizawla hâlpuah hâl vangin mi 14 man tawh niin, thubuai 33 ziah luh a ni tawh. Lungleiah mi pathum man an ni bawk.

Police aṭanga thu dawn danin, Aizawl khawpui chhungah hâlpuah leh hâlmawi kaihhnawihah thubuai 33 ziah luh a ni a, mi 14 man niin, bail-a chhuahtir an ni. Police-te chuan halpuah hâl video an neih tawhte leh report an dawnte an la bawhzui zel dawn.

Halpuah hâl anga Gauhati High Court judge-te puhtu mi pakhat chu police-in an man a, High Court thu angin Central Jail-ah dah luh a ni. Halpuah hâl tura mi dang fuihpawrhtu mi pakhat pawh man a ni a, court thu angin bail-a chhuahtir a ni thung.

Police-te chuan halpuah leh a kaihhnawih zuar mi 14 an man bawk a, thubuai 12 an ziak lut. Mi 14 an mante aṭanga halpuah/halmawi man hlut zawng chu Rs 23,13,555 a tling. Halpuah man hi Aizawl Police Station hnuaiah tam berin mi 10 an ni a; Bawngkawn PS hnuaiah mi pahnih leh Vaivakawn PS leh Kulikawn PS hnuaiah mi pakhat ve ve man a ni. Halpuah man zingah a neitu hriat loh a awm bawk.

Krismas leh kum thar hunpui vuakvêtah Aizawl khawpui chhungah buaina siam vangin mi pali man an ni a; ruihhlo ti ṭhin khawlaia vâkrawlai mi 500 vel khâwm niin, court hmaah buaina an siam loh tur thu tiam tirin chhuah leh an ni.

Aizawl khawpui himna leh ralmuanna atan police-te chu December 21, 2024 aṭanga January 2, 2025 thleng khan police station tinah leh beat post-ah an tlaivar a, khawpui chhung hmun eng emaw zatah duty an indah bawk.

Police hotute hnen aṭanga thu dawn danin, Krismas leh kum thar vuakvetah buaina lian tham thleng a awm lo a, rûkrûk erawh a awm deuh reng thung.

Hetih lai hian, Lunglei khawpuiah chuan kum hlui thlah zana halpuah hâltu mi pathum an man tawh a, an la bawhzui zel bawk.

Vanglaini palai zawhna chhângin Lunglei SP J Lalmuankima chuan, halpuah hal vanga man mi pathumte chu criminal complaint siam turin Lunglei District Magistrate hnenah an thlen tawh thu a sawi a; police special team-in CCTV record leh source dangte aṭangin halpuah hâltute an la ûm zui zel thu a sawi bawk.

Halpuah/halmawi hâl chungchangah hian Home minister K Sapdanga chuan December 31, 2024 zanlai pelh hnu (January 1, 2025) khan media hmaah, halpuah hâlna hmunte hriat a nih hlawm thu sawiin, "Kan en liam mai dawn lo a, sorkar dan bawhchhia an nih miau avangin dan bawhchhia na nâ nâ chu kan ûm zui ve ang. Kum dangah pawh kan chhunzawm leh ang a, hetiang hi a thlen tawh loh kan beisei a ni," a ti.

Home Minister chuan, kum thar lawmna atana halpuah hal a, sorkar thupek leh kohhran leh YMA ngenna zâwm lo an awm chu pawi an tih thu sawiin, "Kan rilru pawh a na em em a ni," a ti a; halpuah hâl a nih lohna tura hma latu hrang hrang - police, YMA leh kohhrante chungah a lawm thu leh, sorkarin halpuah a khapna leh YMA leh kohhrante ngenna zâwmtu Mizoram mipuite chungah a lawm thu a sawi bawk.