December 31 zanah 2023 aiin 2024-ah boruak a thianghlim zawk
Mizoram Pollution Control Board (MPCB) chuan, kum hlui thlahna leh kum thar lawmna atana halpuah hâl kaihhnawihah kum 2023/2024 aiin 2024/2025-ah boruak bawlhhlawh dan a ziaawm zawk hle tih an tarlang.
MPCB hian Sikulpuikâwnah Continuous/Automatic Air Quality Monitoring Station an dah a; chuta Air Quality Index (AQI) chhinchhiah dan chuan, December 31, 2024 khan chhun lamah chawhrualin AQI 52.9 a nih laiin, zanlai dar 12 aṭanga a hnu darkar khat chhungin halpuah hâl vangin AQI 115-ah a kai chho a ni.
Kum 2024/2025 zanlaiah AQI 115 ni mah se, kum kal ta 2023/2024 zanlai dar 12 leh dar 1 inkara AQI 597 aiin a hniam hle zawk. AQI stage-ah 115 hi stage-3 (moderate) a ni a, thâwk lama harsatna nei tan a hlauhawm pha tih an tarlang.
MPC chuan, "Mipuiin boruak ṭha nei zel thei tura sorkar hmalakna thlâwp kawngah hma kan sâwn a, kum hmasa lam aiin hâlpuah leh hâlmâwi kan hâl nasa lo tih a lang," an ti.
Boruaka bawlhhlawh thil nâwi lêng zinga tê zual leh hauhawm zual, taksa chhûngril chuap leh thisena kaltlang thei (PM2.5) pawh December 31, 2024 chhun lamah 6.5 µg/m3 vel a nih laiin, zanlai dar 12 leh dar 1 inkar, halpuah hâl lai vel chuan 25.74 µg/m3 a kai chho a; chhûn lam aiin a lêt li chuangin bawlhhlawh nâwi a pung.
Hetih lai hian, kum hmasa 2023/2024-ah chuan zan dar 12 leh dar 1 inkarah bawlhhlawh nâwi tê zual lêng zat chu 290.2 µg/m3 a ni a, kumin 2024/2025 aiin a lêt 11 chuangin a sang zawk.
MPCB chuan, an zirchiannaa a lan danin, December 31 zing dar 6 leh tlai dar 6 inkar bika AQI chu kum 2023-ah 13.13 a nih laiin, kum 2024-ah chuan 52.9 a nih thu an tarlang a, "Hei hian a entir chu, Aizawl boruak hian a kum têlin bawlhhlawh lam a pan ve zel tihna a ni," an ti.