KHAWTHLIR

State Day of Prayer hman rêl

State Day of Prayer Organising Committee hruaitute chuan nimin tlai khan an patron, chief minister Lalduhoma chu a pisaah huin, kumina State Day of Prayer hman dan tur an sawipui. Kumin 2025-a State Day of Prayer chu Aizawlah chuan a hun ngai, February 20-ah Lammualah hman leh ni se an ti a, district leh khaw tinah hman ni se, an ti. State Day of Prayer atan hian inlungrual taka ṭawngṭainaa hma lakpui turin Mizoram mipui an ngen a ni.

Mitthi nei lo

Champhai Tlangsam Presbyterian Kohhran chuan kum 2024 chhung khan an kohhran member mitthi an nei lo a, hei vang hian January 2, Ningani khan biak-inah lawmthu sawina inkhawm an nei a, tlaiah ruai an ṭheh. Thu dawn danin, Tlangsam Presbyetarian Kohhran hi kum 1910-ah din a ni a, tun dinhmunah member 775 awm mekin, chung zinga 572 chu dan zawh kim an ni.

Governor a chhuak

Mizoram Governor kal chhuak Dr Hari Babu Kambhampati chuan January 2, Ningani khan Mizoram a chhuahsan a, Chief Minister leh minister dangte'n Lengpui Airport-ah an thlah. Hari Babu Kambhampati hi Mizoram Governor 22-na a ni a, July 21, 2021 khan lak luh niin, kum thum leh thla nga chuang hret Mizoram Larsap a ni. Mizoram Governor thar tur Gen. (Dr) Vijay Kumar Singh chu January 8, 2025 khian Mizoram a lo thleng dawn a, January 9-ah Governor atan lak luh a ni ang.

TNT Family Night

Chief minister Lalduhoma chuan December 31, 2024 zan khan Thutak Nunpuitu Team-in an hmuna Family Night an buatsaih a hmanpui. Inkhawm hi TNT hotupa Sangthankima'n a kaihruai a; Chief Minister hian TNT hnenah blanket 100 leh thawmhnaw eng emaw zat a pe a, TNT-in Krismas an hmanna atan Rs 2,00,000 a lo pe tawh bawk. TNT Family Night-ah hian Assembly speaker Lalbiakzama leh bialtu MLA minister Lalthansanga te pawh an tel a ni.