ASF kaihhnawihah Mizoram pumah vawk 62,197 thi, 49,267 suat tawh

Kum 2024 chhung khan Mizoramah African Swine Fever (ASF) vangin vawk 14,950 a thi a, vawk suat 24,177 suat a ni a, vawk thi leh suat zat 39,127 a ni. Kum 2021-a Mizorama ASF a len ṭan aṭanga December 31, 2024 thleng khan vawk 62,197 thiin, vawk 49,267 suat a ni a, a vaiin vawk 1,11,464 a ni.

ASF vanga vawk thi leh suat tam berna Aizawl district-ah 14,156 a awm a, Mizorama vawk thi leh suat zawng zawng aṭangin 36.18% a tling. Mizorama ASF hri a len tirh aṭanga chhûtin kum 2024 hi vawk suat tam ber kum a ni.

Animal Husbandry & Veterinary (AH&Vety) department chhinchhiah danin, kum 2024 chhung khan district 11-ah ASF vangin vawk 14,950 a thi a, chu'ng zinga 5,702 chu Aizawl district-a mi a ni a, Serchhip district-a vawk 3,526 a thi.

Kum 2024 chhunga vawk suat zawng zawng 24,177 zinga 14,156 chu Aizawl district-a mi a ni a; Serchhip district-ah vawk 10,603 suat a ni bawk.

Kum 2021-a Mizorama ASF a lèn ṭan hnuah nikum 2024 kha vawk hri darh tur venna atana vawk suat tam ber kum niin, vawk 24,177 suat a ni a; kum 2021-2024 chhunga vawk suat zawng zawng 49,267 aṭangin 49.07% a tling. ASF vanga vawk thih tam ber kum, 2021 khan vawk 33,417 a thi a ni.