Aizawl tih loh district dang zawngah Raltlante hnenah buhfai sem zo tawh

Sorkar laipuiin pawisa a rawn pek hmanga Mizorama district dang 10-ah raltlante hnena a thlâwna buhfai sem chu zawh a ni tawh a; Aizawl district-ah erawh chuan tun hnai khan buhfai sem ṭan chauh a ni thung.

Mizoram sorkar hotute'n an dil angin sorkar laipuia Ministry of Home Affairs chuan raltlante hnena buhfai sem tur leina atan cheng nuai 500 a pe a, chumi hmang chuan mi pakhat hnenah buhfai kg. 31 leh gram 500 zel pek tura chhûtin buhfai ṭhahnem tak lei a ni.

Mizoram sorkarin raltlan awm zat MHA-a a hriattir zat chu mi 43,788 an ni a; Myanmar raltlan mi 33,764, Manipur raltlan mi 8,010 leh Bangladesh raltlan mi 2,014 an ni.

MHA-in cheng nuai 500 a ruahman chu buhfai metric ton 1,379 chuang lei nan Ministry of Consumer Affairs, Food and Public Distribution hnenah pek a ni a; buhfai chu Food Corporation of India kaltlangin Mizoram sorkara Food, Civil Supplies & Consumer Affairs department hnenah pek a ni.

Thu dawn danin, raltlan tamna ber Champhai district-ah chuan raltlan 14,390 hnenah buhfai quintal 4,533 sem zawh a ni tawh. Champhai district-ah hian Myanmar aṭanga sahimna zawnga rawn lut mi 13,986 leh Manipur aṭanga rawn lut mi 404 an awm mek.

Raltlan tamna ber dawttu Lawngtlai district-ah chuan November 11, 2024 khan raltlante hnenah buhfai sem ṭan a ni a, raltlan mi 8,020 tan buhfai qtl 2,526 sem zawh a ni tawh. Lawngtlai district-ah hian Myanmar aṭanga raltlan mi 5,922 leh Bangladesh aṭanga raltlan mi 2,014 an awm mek a ni.

Siaha district-ah pawh raltlan mi 5,953 hnenah buhfai qtl 1,875 sem zawh a ni tawh a; November 20, 2024 khan sem ṭan a ni. Siaha district-a raltlante chu Myanmar aṭanga rawn lut vek an ni.

Khawzawl district-ah chuan raltlan mi 147 an awm a, an chanpual tura ruahman buhfai qtl. 46 sem zawh a ni tawh. Khawzawl district-a raltlan awm zinga mi 128 chu Myanmar aṭanga rawn lut an ni a, mi 19-te chu Manipur aṭanga rawn lut an ni thung.

Aizawl district-ah erawh chuan raltlan ṭhahnem tak awm mah se, buhfai sem ṭan mai thei a ni lo a, tun hnai khan sem ṭan a ni. Buhfai sem tlai chhan chu - Aizawl district-a raltlan awm zinga tam tak chu khawsa thei deuh, a thlawna buhfai dawn ngai lo an nih avangin, buhdfai dawng tur thlan chhungin hun a duh deuh niin an sawi.