CMO-ah inhlan tharna hun hmang

Chief minister Lalduhoma hoin nimin khan Chief Minister's Office (CMO) chuan CMO conference hall-ah kum thar 2025 atana inhlan tharna hun an hmang a; Chief Minister chuan, mahni awmna hmun ṭheuhah ṭha taka hna thawh chu a zahawm thu a sawi.

CM Lalduhoma chuan, CMO-a thawkte nen kum khat chhung tluang taka an thawkho leh thawktute rim takin an thawh avangin a lawm thu a sawi a, "Kan thawkho zel dawn a, inpawh takin, chhungkua angin engkim kan ti tlâng dial dial ṭhin dawn nia. Hna hi hniam bik a awm lo a, sorkarin a mamawh vanga a lak vek kan ni a, kan eizawnna tura Pathian min pek a ni. Kan awmna hmun ṭheuha ṭha taka kan thawh hian kan hna hi a lo zahawm mai a ni," a ti.

Hna a tam avangin CMO-a thawkte an thawhrim thu sawiin Chief Minister chuan, "Office hunbi pêlin kan awm tam a, kan tlân dâwr dâwr a, programme a tam ṭhin hle. Heng hi Delhi vela an thawh ṭhin dan tho a ni a, keini pawhin kan tih theih lohna tur a awm lo," a ti. Thawktute pawhin an ngaih pawimawhte an sawi bawk.