Mayor-in Aizawl mipui duhsakna a hlan

Aizawl mayor Lalrinenga Sailo chuan, kum thar 2025 pualin thuchah a tichhuak a, Aizawl mipui duhsakna a hlan a; Aizawl Municipal Corporation (AMC)-in bawlhhlawh thliarah kohhran a ngennain zawm a hlawh thu leh an lawm thu a tarlang.

Lalrinenga Sailo chuan, Pathian kaihhruainaa Krismas hunpui tluang leh ralmuang taka hman a ni chu lawmawm a tih thu a tarlang a, "AMC-in bawlhhlawh ṭawih thei leh ṭawih thei lo thliar kawnga kohhran a ngenna chuan zawm a hlawh hle a, kohhran chungah AMC chu kan lawm tak zet. Krismas lawmna atana kâwn chei zawng zawngte chungah pawh lawmthu kan sawi a, hun lo kal zel turah pawh uar deuh deuh turin AMC chuan a ngen che u a ni," a ti.

AMC hmalaknate Aizawl mipuiin ṭha taka an thlâwp ṭhin thu sawiin Mayor chuan, "Kan thawhrimnate a thlawn lo a, Aizawl chuan kawng hrang hrangah chak takin hma a sawn zel. Kum tharah hian AMC-in hmasawn zel turin ṭan a la thar leh dawn a, khawpui nuam zawk kan neih theihna turin dan leh hrai zawm kawngah hma sawn zel turin khua leh tuite kan inngen thar leh a ni," a ti. Kum thar chuan mi tin tan malsawmna thlen sea duh thu sawiin, rilru leh taksa hriselna ṭha tak nena hmang ṭheuh turin Aizawl mipui duhsakna a hlan nghal a ni.