Sorkarin hnam ṭobul chhui chhuah policy pakhatah a dah - Chief Minister

Chief minister Lalduhoma chuan, sorkarin hnam ṭobul chhui chhuah chu a policy pakhatah a dah thu leh a ṭul anga hma an lak dawn thu a sawi.

Chief Minister hian January 4, Inrinni khan 'Mizo History leh Sailo Lal Ropuite: Vandula leh Ropuiliani' tih lehkhabu a tlangzarhnaah thu sawiin, "Tuna Mizo history tam tak chu sap ho chhinchhiah aṭanga hriat a ni a, sap ho lo luh hmaa history tam tak chhui chhuah ngai a la awm. Hei hi ṭhangtharte'n chonaah ngai ila, a tuimi leh history zir kan mithiamte'n i ngaihven ang u. Sorkar pawhin hnam ṭobul chhui chhuah chu a policy pakhatah a dah a, a ṭul angin hma kan la zel dawn a ni," a ti.

Lalduhoma chuan lehkhabu chungchang sawiin, "Vandula leh a nupui Ropuiliani, India freedom fighter ropui leh ngaihsanawm chanchin tam tak min chhawp chhuahsak hi a hlu zual. Anni chanchin hi India mipui pawhin min tuipui tial tial a, an hming kan lam ní apiangin kan inchhuang ṭhin. Ropuiliani lem mawi tak prime minister Pu Narendra Modi ka pe tawh a, a lo ngaihlu thiam hle," a ti a; Ropuiliani phûmna hmun chungchangah sorkar pawmpui theih tur thutlukna a la awm a beisei thu a sawi.

Mizo History leh Sailo Lal Ropuite: Vandula leh Ropuiliani' tih lehkhabu hi Sel Foundation-te'n history lam zir mi palite thawhpuia an buatsaih a ni a, Aijal Club-ah tlangzarh a ni. Vandula leh Ropuilianite tuchhuan hnihna Lalthuama Sailo-in Mizo Historical Map a tlangzarh bawk.

Lehkhabua thu ziaktute'n history ziaka awm tawh leh ṭawngkaa thu inhlan chhâwn an hmuh theihte Mizoram leh ṭhenawm state archive-a mite thlengin an dap a, an hmuh leh hriatte aṭangin scientific research methodology hmangin lehkhabu an buatsaih a ni. Ropuiliani phûmna dik zawng chhuak turin DNA test an kalpui mek thu an tarlang.