Sorkar kum kal mekah thla 8 chhungin chhiah Rs 7,57,24,64,459 hmuh a ni

Taxaton department chuan sorkar kum kal mekah thla riat (April-November 2024) chhungin chhiah Rs 7,57,24,64,459 an hmu tawh.

Taxation department chhiah hmuh dan tarlanna (monthly/annual achievement)-a a lan danin, kum kal mek 2024-25 ah April-November, 2024 chhungin Rs 7,57,24,64,459 hmuh a ni. Sorkar kum hmasa (2023-24) thla 12 chhung khan Rs 11,12,58,73,750 hmuh a ni a, kum hmasa thla 12 chhunga hmuh zat hi kum kal meka thla riat chhunga hmuh zat hian Rs 3,55,34,09,291-in a la pha lo.

Sorkar kum kal meka thla riat chhunga chhiah hmuh Rs 7,57,24,64,459 hi chawhrualin thla tin Rs 94,65,58,057.4 (vbc 94) lut ang a ni. Hetih lai hian, sorkar kum liam ta 2023-24 thla 12 chhunga chhiah hmuh zawng zawng Rs 11,12,58,73,750 chu chawhrualin thla tin Rs 92,71,56,145.8 (vbc. 92) hmuh ang a ni.

Sorkar kum 2005-06 aṭanga November 2024 thlengin Mizoram Taxation department-in chhiah Rs 79,19,58,90,759 (vbc 7,919.58) a hmu tawh a; chu'ng zinga 62.15% chu kum 2017-18 aṭanga kalpui ṭan Goods & Services Tax (GST) aṭanga hmuh niin, Rs 49,22,40,28,174 (vbc 4,922) a ni. GST awm hnuah chhiah hmuh hi a pung nasa hle tih a lang.

Financial year 2017-18 aṭanga GST kalpui a nih hma kum 2005-06 aṭanga 2016-17 chhung khan belhkhawmin chhiah Rs 17,85,41,15,681 hmuh a ni a; chawhrualin kum 12 chhung hian kum tin Rs 1,48,78,42,973 (vbc 148) zel hmuh ang a ni.

Kum 2017-18 aṭanga GST lak a nih hnuah April 2017 aṭanga November 2024 thlengin chhiah Rs 61,34,17,75,078 hmuh a ni a, kum tin chawhrualin Rs 7,66,77,21,885 (vbc 766) zel hmuh ang a tling a; GST awm hma leh awm hnua kum tina chhiah hmuh hi chawhrualin Rs 6,17,98,78,911 (vbc 617)-in a inthlau a ni.