Covid-19 kai lo driver-te chhuahtir Lailapur-a lirthei dan tihtawp a ni
Nimin tlai khan Covid Care Centre (CCC), Thingdawla hnam dang driver, Covid-19 an vei vanga enkawl zinga hripui vei tawh lo mi 72 chhuahtir an ni. Silchar Truck Driver's Association (STDA) pawhin Mizorama lut tur lirtheite September 12 aṭanga dan an titawp nghal.
Vanglaini palai zawhna chhángin Kolasib DC Dr H Lalthlangliana chuan, STDA-te'n an member CCC-a awm zawng zawng chhuah an la phût tlat tih sawiin, "Covid-19 vei tawh lo tih finfiah lohte chu kan chhuah theih loh thuin kan lo chhang. Covid-19 vei tawh lo mi 72 erawh chhuah theih reng an nih thu leh lungawi lohna lantir lo se chuan kan chhuah tawh tur thu kan hrilh a ni," a ti.
Kolasib DC sawi danin, mi 72-te chhuah an nih chuan STDA chuan lungawi lohna lantir tihtawp an intiam a ni. Mi 72-te chhuah an nih tur thu leh STDA lamin lungawi lohna lantir tihtawp an intiam thu chu Cachar DC pawh hrilhhriat nghal a ni.
Thingdawl CCC aṭanga nimina chhuahtir tâk mi 72 zinga pathum chu Mizorama hna thawka awm chhunzawm tur an ni a, a bak mi 69 chu Lailapur thleng hruai thlak an ni. Thingdawl CCC-ah hian hnam dang Covid-19 vei enkawl mek mi 25 vel an la awm.
Vanglaini palai zawhna chhangin STDA hruaitute chuan, an member CCC-a awm mekte chhuahtir vek chu an duh ber a nih thu an sawi a, "Keini chuan an vaia chhuahtir kan phût a, mahse, Kolasib DC-in a phal lo. Chutih rualin, mi 72 chhuahtir an ni pawh hi kan lawm khawp mai. Lailapur an rawn thlen veleh motor dan kan titawp nghal ang," an ti.
Tarlan tawh angin, STDA-te chuan an member, Thingdawl CCC-a awmte chhuahtir vek phûtin September 12 aṭang khan Mizorama lut tur bungraw phur lirtheite an dang a ni.