Chief Secretary-in Kolasib district a tlawh

Chief secretary Khilli Ram Meena chuan January 4, Inrinni khan Kolasib tlawhin, district hotute a kâwm a; loneitute mamawh sorkar official-te'n sorkara an thlen chu sorkar ngaih pawimawh a nih thu a sawi.

DC conference hall-a sorkar hotute a kawmnaah Chief Secretary chuan, Kolasib district chu Mizoram luhka a nih avangin sorkar hmun pawimawh a nih thu a sawi a, "Sorkar anga hmalakna tur awmte chak taka kalpui a ṭul a, inkalpawhna kawng ṭha neih hi hna hmasa a ni. Loneitute hi mipui nunna hnâr an nih angin, loneitute mamawh ngaihtuah a, an hnena thlen chu sorkar ngaih pawimawh a ni," a ti.

Khiili Ram Meena chuan, Kolasib chu Assam state nen inṭhenawm a nih avangin dan kalha state páwn aṭanga thil châwk luhna kawng a ni thei tih hre reng turin a chah a, "Hemi kawnga chak zawka hmalak a nih theih nan state ṭhenawm nen inlaichinna ṭha siam a pawimawh," a ti a, state sorkar thuneihtu nen pawh inbiakpawhna ṭhat a ṭul thu a sawi.

Kolasib chu Mizoram mipui mamawh châwk luhna kawng ber a nih angin kawngpui ṭha neih a nih theih nan chak leh ṭha taka hna thawk turin NHIDCL hotute Chief Secretary chuan a chah bawk.

Chief Secretary hian Bukvanneia Godrej Palm Oil Mill a tlawh nghal a, India sorkarin oil palm-a hmalakna a ngaih pawimawh thu a sawi a ni.